مشرقی ریجن میں ماحولیاتی خلاف ورزی پر 6 غیرملکی گرفتار

سعودی خصوصی فورس برائے ماحولیاتی تحفظ نے مشرقی ریجن میں ماحولیاتی قوانین کی خلاف ورزی پر بھارت، پاکستان اور یمن سے تعلق رکھنے والے 6 غیرملکیوں کو گرفتار کیا ہے، جو علاقے میں معدنیات کا غیرقانونی استحصال کر رہے تھے۔ ان کے خلاف قانونی کارروائی عمل میں لائی گئی ہے۔

فورس کے مطابق، چھ مشینیں بھی ضبط کی گئی ہیں جو مٹی کی کھدائی اور نقل و حمل میں استعمال ہو رہی تھیں۔ فورس نے شہریوں سے اپیل کی ہے کہ وہ ماحول یا جنگلی حیات کے خلاف کسی بھی خلاف ورزی کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔ تمام اطلاعات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔