سعودی عرب میں آج مختلف علاقوں میں گرج چمک کے ساتھ بارش کا امکان

محکمہ موسمیات نے آج منگل کے روز اپنی رپورٹ میں بتایا ہے کہ جازان، عسیر، باحہ، مکہ مکرمہ اور مدینہ منورہ کے بعض حصوں میں درمیانے سے شدید درجے کی گرج چمک کے ساتھ بارشیں متوقع ہیں، جن کے باعث سیلابی صورتحال پیدا ہو سکتی ہے اور ژالہ باری بھی ہو سکتی ہے۔ اس کے علاوہ نجران کے کچھ علاقوں میں بھی بارش برسانے والے بادل بننے کا امکان ہے۔

رپورٹ میں مزید کہا گیا ہے کہ ان علاقوں کے علاوہ مشرقی ریجن کے شمالی حصوں، تبوک اور ریاض کے کچھ حصوں میں بھی گرد و غبار کے طوفان کے ساتھ تیز ہوائیں چل سکتی ہیں۔ اسی طرح خلیج عرب اور بحیرہ احمر کے ساحلی علاقوں میں رات اور صبح کے اوقات میں دھند چھانے کا امکان بھی ظاہر کیا گیا ہے۔

بحیرہ احمر میں سطحی ہوائیں شمال مغرب سے مغرب کی سمت 15 سے 35 کلومیٹر فی گھنٹہ کی رفتار سے چلیں گی، جبکہ جنوب مغرب سے شمال مغرب کی سمت 10 سے 30 کلومیٹر فی گھنٹہ کی رفتار سے بھی ہوائیں چل سکتی ہیں، جو بارش والے بادل بننے پر 50 کلومیٹر فی گھنٹہ سے بھی تجاوز کر سکتی ہیں۔ اس دوران موجوں کی اونچائی آدھے میٹر سے ڈیڑھ میٹر تک، اور بعض اوقات دو میٹر سے بھی زیادہ ہو سکتی ہے۔ سمندر کی حالت عمومی طور پر ہلکی سے درمیانی رہے گی، تاہم بارش والے بادل بننے پر موجیں تیز ہو سکتی ہیں۔

خلیج عرب میں سطحی ہوائیں جنوب مغرب سے جنوب مشرق کی سمت 10 سے 25 کلومیٹر فی گھنٹہ اور جنوب مشرق سے شمال مشرق کی سمت بھی 10 سے 25 کلومیٹر فی گھنٹہ کی رفتار سے چلیں گی۔ موجوں کی اونچائی آدھے میٹر سے ایک میٹر تک رہے گی اور سمندر کی حالت ہلکی موجوں والی ہوگی۔