اقوام متحدہ کا انسانی حقوق کے معاونین پر حملے روکنے کا مطالبہ

اقوام متحدہ نے انسانی حقوق کے معاملات میں اس کے ساتھ تعاون کرنے والوں کے خلاف ڈرانے دھمکانے اور انتقامی کارروائیوں کو فوری طور پر روکنے کی ضرورت پر زور دیا ہے، اور کہا ہے کہ ان کی حفاظت اور خلاف ورزیوں کے ذمہ داروں کا احتساب ضروری ہے۔

یہ بات اقوام متحدہ کے سیکریٹری جنرل کی جانب سے جاری کردہ ایک رپورٹ میں کہی گئی ہے، جس میں 32 ممالک میں انسانی حقوق کے محافظوں، صحافیوں، وکلا، مزدور رہنماؤں اور متاثرین کے خلاف انتقامی کارروائیوں کے واقعات دستاویزی شکل میں پیش کیے گئے ہیں۔ ان کارروائیوں میں من مانی حراست، حملے، نگرانی، دھمکیاں، آن لائن ہراسانی، نقل و حرکت پر پابندی، پاسپورٹ ضبطی اور اہل خانہ کو ڈرانا شامل ہیں۔

رپورٹ میں یہ بھی خبردار کیا گیا ہے کہ ڈیجیٹل ٹیکنالوجی اور انسداد دہشت گردی، سائبر کرائم اور قومی سلامتی سے متعلق قوانین کا استعمال بڑھ رہا ہے، جس کے ذریعے سول سوسائٹی کے کام کو محدود اور انسانی حقوق کے بین الاقوامی اداروں سے تعاون کرنے والوں کو خاموش کرایا جا رہا ہے۔

اقوام متحدہ نے اس بات پر زور دیا ہے کہ اس کے معاونین اور ان کے اہل خانہ کی سلامتی کو یقینی بنانا، سول سوسائٹی کے ساتھ تعاون اور تنظیم کے مینڈیٹ پر عملدرآمد کے لیے ناگزیر ہے۔ اقوام متحدہ نے ممالک سے مطالبہ کیا ہے کہ وہ انسانی حقوق کے محافظوں کے لیے تحفظ کو مضبوط بنائیں اور ان کے کام کے لیے محفوظ ماحول فراہم کریں۔