جازان: شارٹ سرکٹ سے آگ، ماں اور چار بچے جاں بحق

جازان کے ضلع صامطہ کی بستی اللقیہ میں بجلی کے شارٹ سرکٹ سے لگنے والی آگ کے نتیجے میں ایک ماں اور اس کے چار بچے جاں بحق ہو گئے، جبکہ والد کو زخمی حالت میں انتہائی نگہداشت کے وارڈ میں منتقل کیا گیا ہے۔

بچوں کے چچا محمد محنشی نے العربیہ چینل سے گفتگو میں بتایا کہ حادثے کے فوراً بعد انہوں نے سول ڈیفنس اور ہلال احمر کو اطلاع دی، جس پر امدادی ٹیمیں فوری طور پر موقع پر پہنچ گئیں۔

محنشی کے مطابق آگ ایک برقی توسیع بورڈ پر زیادہ لوڈ آنے سے لگی، جس کے باعث وہ پھٹ گیا۔ انہوں نے کہا کہ غالباً حادثے کے وقت تمام افراد سو رہے تھے اور دروازہ بند ہونے کی وجہ سے کسی کو ان کی آواز سنائی نہیں دی۔

انہوں نے مزید بتایا کہ ریسکیو ٹیموں کو آگ بجھانے اور متاثرین کو نکالنے کے لیے دروازہ توڑنا پڑا۔