سعودی عرب: ایک ہفتے میں 14,434 اقامہ و سرحدی قوانین کے خلاف ورزی کرنے والے گرفتار

سعودی عرب میں اقامہ، محنت اور سرحدی قوانین کی خلاف ورزی کرنے والوں کی نگرانی اور گرفتاری کے لیے مشترکہ مہمات 20 سے 26 اگست 2026 تک ملک بھر میں چلائی گئیں، جن کے دوران 14,434 افراد کو گرفتار کیا گیا۔

گرفتار ہونے والوں میں 6,976 افراد اقامہ قوانین، 4,110 سرحدی سیکیورٹی قوانین اور 3,348 محنت قوانین کی خلاف ورزی میں ملوث پائے گئے۔

غیر قانونی سرحد عبور کرنے والے اور معاونین گرفتار

اس دوران 1,450 افراد کو مملکت میں غیر قانونی طور پر داخل ہونے کی کوشش کرتے ہوئے گرفتار کیا گیا، جن میں 41٪ یمنی، 58٪ ایتھوپیائی اور 1٪ دیگر ممالک کے شہری تھے۔ اسی طرح 44 افراد کو مملکت سے غیر قانونی طور پر باہر جانے کی کوشش میں گرفتار کیا گیا۔

سیکیورٹی اداروں نے 27 افراد کو اقامہ و سرحدی قوانین کی خلاف ورزی کرنے والوں کو نقل و حمل، پناہ دینے، ملازمت فراہم کرنے یا ان کی معاونت کرنے کے الزام میں بھی گرفتار کیا۔

قانونی کارروائیاں اور ملک بدری

اس وقت 29,938 غیر ملکی افراد کے خلاف قانونی کارروائیاں جاری ہیں، جن میں 27,957 مرد اور 1,981 خواتین شامل ہیں۔ 18,914 افراد کو سفری دستاویزات کے حصول کے لیے ان کے سفارتی مشنز کے حوالے کیا گیا، 2,867 افراد کو سفر کی بکنگ مکمل کرنے کے لیے بھیجا گیا، جبکہ 14,905 افراد کو ملک بدر کر دیا گیا۔

سخت سزائیں اور انتباہ

وزارت داخلہ نے خبردار کیا ہے کہ جو کوئی بھی سرحدی قوانین کے خلاف ورزی کرنے والوں کو مملکت میں داخل ہونے، نقل و حمل، پناہ دینے یا کسی بھی طرح کی مدد فراہم کرے گا، اسے 15 سال قید اور ایک ملین سعودی ریال تک جرمانہ ہو سکتا ہے، اس کے علاوہ نقل و حمل اور رہائش کی سہولت ضبط اور نام شائع کیا جائے گا۔

وزارت نے واضح کیا کہ یہ جرم سنگین اور قابل گرفتاری جرائم میں شامل ہے جو عزت و امانت کے منافی ہے۔ شہریوں کو ہدایت کی گئی ہے کہ وہ کسی بھی خلاف ورزی کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔