پانی اور سیوریج کے نرخ 2027 سے تبدیل ہوں گے، رہائشی صارفین کے لیے چار درجے مقرر

نیشنل واٹر کمپنی نے پانی اور سیوریج سروسز کے نرخوں میں تبدیلی کا اعلان کیا ہے، جو رہائشی، غیر رہائشی اور سرکاری شعبوں پر لاگو ہوں گے۔ یہ تبدیلی یکم جنوری 2027 سے نافذ کی جائے گی اور اس کا اطلاق توانائی اور پانی کی مصنوعات کی قیمتوں میں رد و بدل کے حکومتی ضوابط کے مطابق ہوگا۔

کمپنی کی ویب سائٹ پر جاری تفصیلات کے مطابق رہائشی شعبے میں اب پانی کے استعمال کی چار درجے ہوں گے اور ان کی قیمتیں بھی تبدیل کی گئی ہیں۔ اس کے علاوہ ماہانہ میٹر سروس فیس کو ختم کر کے اب ایک مقررہ ماہانہ فیس رکھی گئی ہے، جو میٹر کے قطر اور اضافی یونٹس کی تعداد کے حساب سے وصول کی جائے گی۔

رہائشی شعبہ

پہلا درجہ صفر سے 15 مکعب میٹر تک کے استعمال پر مشتمل ہے، جس میں پانی کا نرخ ایک سعودی ریال فی مکعب میٹر اور سیوریج کا 0.5 ریال مقرر کیا گیا ہے۔ دوسرا درجہ 15 سے 30 مکعب میٹر تک کے استعمال پر ہے، جس میں پانی کے لیے دو ریال اور سیوریج کے لیے ایک ریال فی مکعب میٹر وصول کیے جائیں گے۔

تیسرا درجہ 30 سے 45 مکعب میٹر کے درمیان ہے، جس میں پانی کے لیے چار ریال اور سیوریج کے لیے دو ریال فی مکعب میٹر مقرر ہیں۔ چوتھا درجہ 45 مکعب میٹر سے زائد کے استعمال پر لاگو ہوگا، جس میں پانی کے لیے چھ ریال اور سیوریج کے لیے تین ریال فی مکعب میٹر وصول کیے جائیں گے۔

رہائشی یونٹ کے لیے مقررہ ماہانہ فیس میٹر کے قطر کے حساب سے ہوگی: 20 ملی میٹر تک کے میٹر پر پانی کے لیے 20 ریال اور سیوریج کے لیے 10 ریال، 21 سے 40 ملی میٹر کے میٹر پر 40 اور 20 ریال، 41 سے 65 ملی میٹر پر 60 اور 30 ریال، 66 سے 100 ملی میٹر پر 80 اور 40 ریال، اور 100 ملی میٹر سے زائد کے میٹر پر 100 اور 50 ریال ماہانہ وصول کیے جائیں گے۔ ہر اضافی یونٹ پر 20 ریال پانی اور 10 ریال سیوریج کے لیے اضافی فیس ہوگی۔

غیر رہائشی شعبہ

غیر رہائشی شعبے میں اب صرف ایک ہی درجہ ہوگا، جس میں پانی کے لیے آٹھ ریال اور سیوریج کے لیے چار ریال فی مکعب میٹر مقرر کیے گئے ہیں۔ یہاں بھی ماہانہ میٹر سروس فیس کی جگہ مقررہ ماہانہ فیس ہوگی، جو میٹر کے قطر کے مطابق ہوگی۔

اس شعبے میں 20 ملی میٹر تک کے میٹر پر پانی کے لیے 40 ریال اور سیوریج کے لیے 20 ریال، 21 سے 40 ملی میٹر پر 60 اور 30 ریال، 41 سے 65 ملی میٹر پر 80 اور 40 ریال، 66 سے 100 ملی میٹر پر 100 اور 50 ریال، اور 100 ملی میٹر سے زائد کے میٹر پر 150 اور 75 ریال ماہانہ مقرر ہیں۔

سرکاری شعبہ

سرکاری شعبے میں استعمال کا درجہ 10 ریال فی مکعب میٹر پانی اور پانچ ریال فی مکعب میٹر سیوریج مقرر کیا گیا ہے، جبکہ مقررہ ماہانہ فیس پانی کے لیے 1000 ریال اور سیوریج کے لیے 500 ریال ہوگی۔

اعلان کردہ نرخوں کے مطابق سیوریج کی فیس ہر شعبے اور ہر درجہ میں پانی کی فیس کے نصف کے برابر ہے، چاہے وہ فی مکعب میٹر ہو یا مقررہ ماہانہ فیس۔

شہریوں کے لیے معاون اقدامات

یہ اعلان سعودی انرجی کمپنی کی جانب سے اسی تاریخ سے بجلی کے نرخوں میں تبدیلی کے اعلان کے ساتھ سامنے آیا ہے۔ خادم الحرمین الشریفین شاہ سلمان بن عبدالعزیز کی ہدایت پر، جو ولی عہد و وزیراعظم شہزادہ محمد بن سلمان کی سفارش پر دی گئی، شہریوں کے لیے کئی معاون اقدامات بھی کیے گئے ہیں۔ ان میں سب سے نمایاں سرکاری و نجی ملازمین، فوجی اہلکاروں اور پنشنرز کے لیے 500 ریال ماہانہ الاؤنس اور اسی رقم کی ماہانہ امداد سوشل سکیورٹی سے مستفید ہونے والے خاندانوں کے لیے ہے۔

کمپنی نے صارفین کو ہدایت کی ہے کہ وہ نرخوں اور بلوں سے متعلق معلومات کے لیے 8004411110 پر کال کریں، یا کمپنی کی ایپ اور ویب سائٹ سے رابطہ کریں۔