مدینہ منورہ کا تاریخی بئر اریس: خاتم نبوی اور خلفا کی بشارت سے جڑی یادیں

تاریخی ذرائع کے مطابق مدینہ منورہ کے علاقے قباء میں واقع بئر اریس وہ کنواں ہے جہاں نبی اکرم ﷺ کا خاتم مبارک گر گیا تھا، جس کے بعد یہ کنواں 'بئر الخاتم' کے نام سے بھی مشہور ہوا۔

سعودی عرب کی سرکاری انسائیکلوپیڈیا کے مطابق بئر اریس مدینہ منورہ کے ان معروف کنوؤں میں شمار ہوتی ہے جو سیرت نبوی سے خاص نسبت رکھتی ہیں اور اس کی تاریخی و دینی اہمیت مسلم ہے۔

صحیح بخاری میں مذکور ایک روایت کے مطابق نبی اکرم ﷺ اس کنویں کے پاس تشریف فرما ہوئے اور حضرت ابوبکر، حضرت عمر اور حضرت عثمان رضی اللہ عنہم کو اندر آنے کی اجازت دی اور انہیں جنت کی بشارت دی، جس سے اس کنویں کو اسلامی تاریخ میں خصوصی مقام حاصل ہوا۔

واضح رہے کہ نبی اکرم ﷺ کا خاتم مبارک سرکاری خطوط پر مہر لگانے کے لیے استعمال ہوتا تھا، جو چاندی کا بنا ہوا تھا اور اس پر 'محمد رسول اللہ' کندہ تھا۔ یہ خاتم آپ ﷺ کے وصال کے بعد حضرت ابوبکر، پھر حضرت عمر اور پھر حضرت عثمان رضی اللہ عنہم کے پاس رہا، یہاں تک کہ تقریباً 30 ہجری میں حضرت عثمان کے ہاتھ سے یہ کنویں میں گر گیا۔ کئی دنوں تک اس کی تلاش جاری رہی مگر نہ مل سکا، اور یہ واقعہ مدینہ منورہ کی تاریخ کے اہم واقعات میں شمار ہوتا ہے۔