دوسری سہ ماہی میں 26.34 ملین افراد نے پبلک ٹرانسپورٹ استعمال کی

سعودی عرب میں 2026 کی دوسری سہ ماہی کے دوران شہروں اور صوبوں کے اندر پبلک بسوں کے ذریعے سفر کرنے والوں کی تعداد میں 23.2 فیصد اضافہ ہوا، جس کے بعد یہ تعداد 26.34 ملین سے تجاوز کر گئی۔ یہ اعداد و شمار گزشتہ سال کی اسی مدت کے مقابلے میں زیادہ ہیں اور یہ معلومات جنرل اتھارٹی فار ٹرانسپورٹ کی سہ ماہی رپورٹ میں جاری کی گئی ہیں۔

اتھارٹی نے بتایا کہ اس اضافے سے ظاہر ہوتا ہے کہ شہروں اور صوبوں کے اندر بسوں کے ذریعے سفر کرنے کا رجحان بڑھ رہا ہے، جس کی وجہ ان بسوں کی جدید سہولیات اور اعلیٰ معیار کی آپریشنل خصوصیات ہیں۔ یہ نتائج اتھارٹی کی جانب سے سرکاری اور نجی شعبے کے شراکت داروں کے ساتھ مل کر بس سروسز کی بہتری، آپریشنل کارکردگی میں اضافہ اور ان کے دائرہ کار کو مزید علاقوں اور اہم مقامات تک وسعت دینے کی کوششوں کا تسلسل ہیں۔

مسافروں کی تعداد کے لحاظ سے ریاض سرفہرست رہا، جہاں 20.07 ملین افراد نے بسوں کے ذریعے سفر کیا۔ اس کے بعد مکہ مکرمہ میں 2.97 ملین اور جدہ میں 1.19 ملین مسافر ریکارڈ کیے گئے۔

مملکت کے دیگر شہروں میں دمام اور قطیف میں 8 لاکھ 35 ہزار، مدینہ منورہ میں تقریباً 4 لاکھ 90 ہزار، القصیم میں 2 لاکھ 73 ہزار، طائف میں 1 لاکھ 94 ہزار، الاحساء میں 1 لاکھ 35 ہزار، جازان میں 1 لاکھ 20 ہزار اور تبوک میں 56 ہزار مسافروں نے پبلک بسیں استعمال کیں۔