روبرتو کارلوس نے 99 فیصد دولت کھونے کی وجہ بتا دی

برازیل کے سابق اسٹار فٹبالر روبرتو کارلوس نے انکشاف کیا ہے کہ انہوں نے اپنے کیریئر کے دوران جمع کی گئی دولت کا بڑا حصہ خاندانی مسائل اور ایجنٹس کے ساتھ غلط معاملات کی وجہ سے کھو دیا۔ کارلوس نے پرتگال میں فٹبالرز کے کیریئر اور ریٹائرمنٹ کے بعد کی زندگی پر ہونے والی ایک کانفرنس میں بتایا کہ ان مشکلات نے ان کی مالی اور ذاتی زندگی پر گہرا اثر ڈالا۔

پرتگالی اخبار ریکارڈ کو دیے گئے انٹرویو میں ریال میڈرڈ کے سابق ڈیفینڈر نے کہا کہ انہیں ان مسائل کے باعث فٹبالر کے طور پر اپنی آمدنی کا 99 فیصد حصہ گنوانا پڑا۔ انہوں نے مزید بتایا کہ متعدد غلطیوں کے بعد انہیں اپنے مالی اور خاندانی معاملات کو دوبارہ ترتیب دینا پڑا۔ کارلوس نے نوجوان کھلاڑیوں کو نصیحت کی کہ وہ ان کی غلطیوں سے سبق سیکھیں اور انہیں دہرانے سے گریز کریں۔

کارلوس نے واضح کیا کہ انہیں اپنے سابق ایجنٹ کے ساتھ سنجیدہ مسائل کا سامنا کرنا پڑا، جبکہ خاندانی بحرانوں نے بھی ان پر گہرا اثر ڈالا۔ انہوں نے بتایا کہ ایک دن انہیں کچھ مالی دستاویزات موصول ہوئیں جن سے وہ لاعلم تھے، جس کے بعد وہ اپنے مالی معاملات پر کنٹرول کھو بیٹھے۔

ذاتی تجربہ اور نوجوانوں کے لیے مشورہ

ورلڈ کپ 2002 اور ریال میڈرڈ کے ساتھ تین بار چیمپئنز لیگ جیتنے والے کارلوس نے افسوس کا اظہار کیا کہ وہ ایسے افراد کا شکار ہوئے جنہوں نے ان کے اکاؤنٹس خالی کر دیے، تاہم انہوں نے مزید تفصیلات نہیں بتائیں۔ انہوں نے نوجوان کھلاڑیوں کو مالی اور خاندانی معاملات میں احتیاط برتنے کی نصیحت کی تاکہ وہ انہی غلطیوں کا شکار نہ ہوں۔

ایکس پر اصل پوسٹ دیکھیں

واضح رہے کہ 53 سالہ روبرتو کارلوس اس وقت ریال میڈرڈ اور فیفا کے سفیر کے طور پر خدمات انجام دے رہے ہیں۔