فیفا کا 20 ارب ڈالر کے تجارتی ادارے کا منصوبہ، یوفا کو اعتراض

فیفا نے 20 ارب ڈالر مالیت کے ایک نئے تجارتی ادارے کے قیام کا منصوبہ پیش کیا ہے، جس کے تحت بیرونی سرمایہ کاروں کو اس ادارے میں اقلیتی حصص فروخت کرنے کی تجویز ہے۔ یہ منصوبہ رکن قومی فیڈریشنز اور فیفا کونسل کے سامنے پیش کیا جائے گا، جبکہ یوفا نے اس پر اعتراضات اٹھائے ہیں۔

اس تجویز کے مطابق، فیفا کی مکمل ملکیت میں 'فیفا فارورڈ انٹرپرائز' کے نام سے ایک ادارہ قائم کیا جائے گا، جو فیفا کی تجارتی سرگرمیوں اور ایونٹس کے انتظام کو یکجا کرے گا۔ فیفا کھیل، مقابلوں، شیڈول اور تمام انتظامی و کھیل سے متعلق فیصلوں پر مکمل کنٹرول برقرار رکھے گا۔

منصوبے کے تحت فیفا بیرونی سرمایہ کاروں کو غیر کنٹرولنگ اقلیتی حصص کی فروخت کے ذریعے 4.2 ارب ڈالر تک جمع کرنا چاہتا ہے۔ فیفا نے کہا ہے کہ حاصل ہونے والا منافع مکمل طور پر فٹبال کی ترقی میں دوبارہ لگایا جائے گا۔

فیفا کے صدر جیانی انفانٹینو نے کہا کہ فٹبال دنیا کا مقبول ترین کھیل ہے اور انسانی و سماجی ترقی کے لیے اہم کردار ادا کرتا ہے۔ انہوں نے کہا کہ اس کھیل کی مقبولیت کو تجارتی قدر میں بدلنا کھیل کے مفاد میں ہے اور فیفا کی ذمہ داری ہے کہ فٹبال کے نظام کو پائیدار اور جامع انداز میں فروغ دے۔

انفانٹینو نے مزید کہا کہ ہر رکن فیڈریشن کو دستیاب مالی وسائل میں سے منصفانہ حصہ ملنا چاہیے تاکہ وہ اپنا مستقبل خود طے کر سکے۔ ان کے مطابق یہ منصوبہ دنیا بھر میں فٹبال کو جمہوری بنانے کے لیے ہے۔

دوسری جانب، یوفا نے اس تجویز پر شدید تنقید کی ہے اور کہا ہے کہ یہ منصوبہ فٹبال کی گورننگ باڈیز کے اختیارات سے تجاوز کرتا ہے۔ یوفا نے قومی فیڈریشنز، لیگوں، کلبوں، کھلاڑیوں، شائقین اور حکومتوں سے مطالبہ کیا ہے کہ اس معاملے کو سنجیدگی سے لیں۔

یوفا نے کہا کہ فٹبال کی روح اور اس کا انتظام فروخت یا تجارت کے قابل اثاثے نہیں ہیں، خاص طور پر جب یہ واضح نہ ہو کہ اس منصوبے سے مالی فائدہ کس کو ہوگا۔ یوفا نے کہا کہ فیفا کو فٹبال فروخت کرنے کا حق نہیں ہے۔

فیفا کے ترجمان نے واضح کیا کہ یہ تجویز جلد ہی 211 رکن فیڈریشنز اور فیفا کونسل کے سامنے حتمی فیصلے کے لیے پیش کی جائے گی۔

اسی حوالے سے ایک باخبر ذریعے نے بتایا کہ فیفا جے پی مورگن بینک کے بینکاروں کے ساتھ مل کر اربوں ڈالر جمع کرنے کے لیے کام کر رہا ہے، جس میں بیرونی سرمایہ کار ادارے کے 20 فیصد تک حصص حاصل کر سکتے ہیں۔

ذرائع کے مطابق، لیبرٹی میڈیا کے سابق سی ای او گریگ مافی اس منصوبے میں تجارتی مشیر کے طور پر شریک ہیں، جبکہ 'تھروائیو ایٹرنل' اس ادارے کی مرکزی سرمایہ کار ہو سکتی ہے۔

ذرائع نے مزید بتایا کہ 'تھروائیو ایٹرنل' طویل مدتی تجارتی اور ثقافتی اداروں میں سرمایہ کاری پر توجہ دیتی ہے اور اس نے رواں سال امریکی بیس بال لیگ کی ٹیم سان فرانسسکو جائنٹس میں اقلیتی حصص خریدے تھے۔

ذرائع کے مطابق، 'تھروائیو ایٹرنل' کی بنیاد جوشوا کشنر نے رکھی ہے، جو جیرڈ کشنر کے بھائی اور سابق امریکی صدر ڈونلڈ ٹرمپ کے داماد ہیں، جبکہ والٹ ڈزنی کے سابق سی ای او باب ایگر اس میں مشیر ہیں۔ ذرائع نے یہ بھی واضح کیا کہ جیرڈ کشنر اس سودے میں ممکنہ سرمایہ کاروں میں شامل نہیں ہیں۔

فائنانشل ٹائمز نے سب سے پہلے فیفا کے اس نئے تجارتی ادارے میں حصص فروخت کرنے کے منصوبے کی خبر دی تھی۔