ریال میڈرڈ نے وینیسیئس کی منتقلی کیلئے 160 ملین یورو کی شرط رکھ دی

برازیلی فٹبالر وینیسیئس جونیئر کے مستقبل کا فیصلہ کن ہفتہ شروع ہو گیا ہے، جبکہ ریال میڈرڈ میں ان کے قیام کے حوالے سے غیر یقینی صورتحال برقرار ہے اور دونوں فریقین کے درمیان تعلقات میں تناؤ پایا جاتا ہے۔

اسپین کے اخبار اسپورٹ کے مطابق، ریال میڈرڈ کے صدر فلورنتینو پیریز کی قیادت میں کلب انتظامیہ نے وینیسیئس جونیئر کی منتقلی کے خواہشمند تمام کلبوں کیلئے 160 ملین یورو (تقریباً 1.7 ارب سعودی ریال) کی شرط حتمی طور پر مقرر کر دی ہے۔

رپورٹ میں مزید بتایا گیا ہے کہ ریال میڈرڈ اس رقم سے کم کسی بھی پیشکش پر بات چیت نہیں کرے گا۔ کلب ایک ایسے معاہدے پر غور کر رہا ہے جس میں ایک مقررہ رقم کے ساتھ ساتھ کھلاڑی کی کارکردگی اور جیتے گئے ٹائٹلز سے منسلک اضافی ادائیگیاں بھی شامل ہوں گی۔

وینیسیئس کا ریال میڈرڈ کے ساتھ معاہدہ 2027 تک ہے، جس کے بعد وہ مفت میں بھی جا سکتے ہیں، تاہم کلب کی انتظامیہ چاہتی ہے کہ اگر فروخت کا فیصلہ ہو تو زیادہ سے زیادہ مالی فائدہ حاصل کیا جائے۔

کھلاڑی کے مطالبات اور کلبوں کی دلچسپی

پہلے سامنے آنے والی رپورٹس کے مطابق، پیریز وینیسیئس کی بار بار تجدید معاہدہ کی شرائط اور خاص طور پر 15 ملین یورو کی سائننگ فیس کے مطالبے سے ناخوش ہیں۔

اسی حوالے سے برطانوی ویب سائٹ 'دی ایتھلیٹک' نے بتایا ہے کہ انگلش کلب آرسنل وینیسیئس جونیئر کو حاصل کرنے میں سب سے زیادہ دلچسپی رکھتا ہے اور اس سلسلے میں عملی طور پر امکانات کا جائزہ لے رہا ہے۔

واضح رہے کہ اگر وینیسیئس کے ساتھ معاہدہ کی تجدید پر اتفاق نہ ہوا تو ریال میڈرڈ کو آئندہ ہفتے موصول ہونے والی پیشکشوں پر غور کرنا پڑے گا۔