رابطہ عالم اسلامی کی حوثی حملوں کی شدید مذمت

رابطہ عالم اسلامی نے حوثی دہشت گرد ملیشیا کی جانب سے سعودی عرب پر جاری جارحانہ حملوں اور خمیس مشیط، ابہا اور جازان جیسے شہروں کو بیلسٹک میزائلوں اور ڈرونز سے نشانہ بنانے کی شدید مذمت کی ہے۔

رابطہ کی جنرل سیکریٹریٹ کے بیان میں معالی سیکریٹری جنرل اور سربراہ مجلس علمائے مسلمین، فضیلت الشیخ ڈاکٹر محمد بن عبد الکریم العیسیٰ نے ان مجرمانہ اور بزدلانہ حملوں کی شدید مذمت کی، جن سے مذہبی اقدار، بین الاقوامی قوانین اور انسانی اصولوں کی کھلی خلاف ورزی ہوتی ہے اور یہ ظاہر کرتا ہے کہ یہ دہشت گرد ملیشیا دانستہ طور پر شہریوں اور شہری تنصیبات کو نشانہ بنا رہی ہے۔

انہوں نے رابطہ کی عالمی تنظیموں، اداروں اور کونسلوں اور اس کے زیر سایہ تمام مسلم اقوام کی جانب سے سعودی عرب کے ساتھ مکمل یکجہتی کا اعادہ کیا اور کہا کہ مملکت کی سلامتی، شہریوں و مقیمین کے تحفظ اور ملکی وسائل کے دفاع کے لیے کیے گئے تمام اقدامات کی مکمل حمایت جاری رہے گی۔ انہوں نے دعا کی کہ اللہ تعالیٰ سعودی عرب، اس کی قیادت اور عوام کو ہر آفت اور برائی سے محفوظ رکھے۔