ٹرینٹ الیگزینڈر آرنلڈ لیورپول مداحوں کی تنقید پر افسردہ

ٹرینٹ الیگزینڈر آرنلڈ نے اس بات پر شدید افسوس کا اظہار کیا ہے کہ لیورپول سے ریال میڈرڈ میں 2025 میں معاہدہ ختم ہونے کے بعد منتقلی پر انہیں مداحوں کی جانب سے توہین آمیز رویے کا سامنا کرنا پڑا۔

انہوں نے واضح کیا کہ اس سب کے باوجود وہ اپنے سابقہ کلب کی تمام میچز باقاعدگی سے دیکھتے اور ٹیم کو سپورٹ کرتے ہیں۔

الیگزینڈر آرنلڈ، جن کی عمر 27 برس ہے، نے بتایا کہ انہیں صرف انٹرنیٹ پر ہی ایسی بدسلوکی کا سامنا کرنا پڑا، جبکہ جب وہ اپنے اہل خانہ سے ملنے مرسی سائیڈ واپس آئے تو وہاں کسی نے برا سلوک نہیں کیا۔

انہوں نے کہا کہ لیورپول میں ان کے نام کی دیوار پر 'غدار' لکھا گیا۔

اخبار 'میرر' کو دیے گئے انٹرویو میں الیگزینڈر آرنلڈ نے کہا کہ سوشل میڈیا پر دھمکیاں اب عوامی شخصیات کی زندگی کا حصہ بن چکی ہیں، تاہم انہوں نے اس بات پر زور دیا کہ یہ رویہ نہ تو لیورپول کلب اور نہ ہی اس شہر کی نمائندگی کرتا ہے جس سے وہ محبت کرتے ہیں۔

انہوں نے مزید کہا کہ وہ لیورپول کے مداحوں کی ناراضی کو سمجھتے ہیں اور امید ظاہر کی کہ مستقبل میں سب ان کے فیصلے کی وجوہات کو سمجھ سکیں گے، خاص طور پر ان قربانیوں کے بعد جو انہوں نے کلب کے لیے دیں۔

انہوں نے یہ بھی کہا کہ جب وہ لیورپول آتے ہیں تو وہاں ملنے والا مثبت رویہ آن لائن نفرت کے اثرات کو کم کر دیتا ہے۔

الیگزینڈر آرنلڈ نے گفتگو کے اختتام پر اس بات پر زور دیا کہ ان کی محبت اور حمایت لیورپول کے لیے ہمیشہ برقرار رہے گی اور یہ کلب ہمیشہ ان کا گھر اور مواقع دینے والی جگہ رہے گا۔