بارسلونا کے مداح کی جانب سے کاماوینگا پر مبینہ حملے کی تحقیقات

اسپینش فٹبال لیگ (لالیگا) نے اعلان کیا ہے کہ وہ ریال میڈرڈ کے کھلاڑی ایڈوارڈو کاماوینگا پر مبینہ حملے کے واقعے کی تحقیقات کرے گی۔ یہ واقعہ بارسلونا کے خلاف میچ کے دوران پیش آیا، جو ریال میڈرڈ نے 2-1 سے جیتا۔ میچ بارسلونا کے کیمپ نو اسٹیڈیم میں کھیلا گیا۔

دی ایتھلیٹک ویب سائٹ کے مطابق، لالیگا اس واقعے کو اپنی تادیبی کمیٹی کے سپرد کرے گی۔ سوشل میڈیا پر وائرل ہونے والی ایک ویڈیو میں دیکھا جا سکتا ہے کہ بارسلونا کے ایک مداح نے ریال میڈرڈ کے فرانسیسی مڈفیلڈر کاماوینگا کو جھنڈے کی چھڑی سے اس وقت مارا جب وہ اپنی ٹیم کے فتح کے گول کا جشن منا رہے تھے۔ یہ گول کیلیان ایمباپے نے میچ کے 87ویں منٹ میں کیا تھا۔

کاماویگا نے اس گول میں اہم کردار ادا کیا تھا، جب انہوں نے بارسلونا کے مدافع پاؤ کوبارسی کو ڈاج دے کر گیند ایمباپے کو پاس کی۔ ویڈیو میں دیکھا گیا کہ ریال میڈرڈ کے کھلاڑی جشن منانے کے لیے اسٹینڈز کے قریب پہنچے، اسی دوران ایک مداح نے جھنڈے کی چھڑی کاماوینگا کی طرف لہرائی۔

اس موقع پر اوریلیان چوامینی نے مداخلت کرتے ہوئے اپنے ساتھی کھلاڑیوں کو ہجوم سے دور کیا۔ اس دوران اسٹینڈز سے مختلف اشیاء بھی پھینکی گئیں۔ میچ ریفری خوان مارٹینیز مونوئیرا نے اپنی رپورٹ میں لکھا کہ جشن کے دوران پانی کی بوتل اور کوکا کولا کا کین پھینکا گیا، تاہم کوئی کھلاڑی زخمی نہیں ہوا۔

ریفری نے اس موقع پر میدان میں اشیاء پھینکنے کے پروٹوکول کو فعال کیا اور لاوڈ اسپیکر کے ذریعے اعلان کیا گیا کہ میچ ایک منٹ 20 سیکنڈ کے لیے روکا جا رہا ہے۔

لالیگا کے ذرائع کے مطابق، واقعے کی ویڈیو وائرل ہونے کے بعد اسے تادیبی کمیٹی کے سپرد کیا جائے گا۔ لیگ نے ایک بار پھر اس عزم کا اعادہ کیا ہے کہ ہسپانوی فٹبال میں تشدد اور عدم برداشت کے خاتمے کے لیے زیرو ٹالرنس پالیسی پر عمل کیا جائے گا۔ اب یہ معاملہ متعلقہ تادیبی اداروں کے سپرد ہے، جو قواعد کے مطابق کارروائی کریں گے۔