ایران میں 110 لیٹر سے زائد پٹرول پر قیمت میں اضافہ

ایران نے اعلان کیا ہے کہ جو صارفین ماہانہ 110 لیٹر سے زیادہ پٹرول استعمال کریں گے، ان کے لیے قیمتیں منگل سے بڑھا دی جائیں گی۔ اس اقدام کا مقصد ملک کو درپیش بڑھتی ہوئی معاشی مشکلات سے نمٹنا ہے، جو جنگ اور امریکی پابندیوں کے باعث پیدا ہوئی ہیں۔

ایرانی حکومت کی ترجمان فاطمہ مہاجرانی کے مطابق، ابتدائی دو کوٹے یعنی مجموعی طور پر 110 لیٹر کی قیمت میں کوئی تبدیلی نہیں کی جائے گی، تاہم تیسری کوٹے کی قیمت 100 ہزار ایرانی ریال فی لیٹر ہو گی، جو کہ آزاد منڈی کے نرخ کے مطابق تقریباً چار سینٹ بنتی ہے۔ یہ بات انہوں نے سرکاری میڈیا سے گفتگو میں کہی۔

مہاجرانی نے مزید وضاحت کی کہ یہ فیصلہ ان صارفین پر لاگو نہیں ہوگا جن کا ماہانہ استعمال 110 لیٹر سے کم ہے۔ ایسے ڈرائیورز 60 لیٹر پٹرول 15 ہزار ریال فی لیٹر اور مزید 50 لیٹر 30 ہزار ریال فی لیٹر کے حساب سے خرید سکیں گے۔

یہ اقدام ایسے وقت میں کیا گیا ہے جب ایرانی حکومت ایندھن کی بڑھتی ہوئی طلب پر قابو پانے کی کوشش کر رہی ہے، جبکہ ملک کو شدید معاشی دباؤ کا سامنا ہے۔

اس سے قبل حکومت نے پٹرول کی قیمتوں میں اضافے پر غور کیا تھا، جو دنیا میں سب سے سستا شمار ہوتا ہے، تاہم 2019 میں قیمتوں میں اضافے کے بعد ملک گیر احتجاج کے خدشے کے پیش نظر اس فیصلے کو مؤخر کر دیا گیا تھا۔

گزشتہ دسمبر میں ایران نے زیادہ تر صارفین کے لیے سبسڈی والے پٹرول کی قیمت جزوی طور پر بڑھا دی تھی، تاکہ ایندھن کی بڑھتی ہوئی طلب کو کنٹرول کیا جا سکے۔