امریکی قومی قرضہ 40 کھرب ڈالر سے تجاوز کر گیا

امریکی قومی قرضہ پہلی بار 40 ہزار ارب ڈالر سے تجاوز کر گیا ہے، جیسا کہ بدھ کو جاری ہونے والی محکمہ خزانہ کی رپورٹ میں بتایا گیا ہے، جب کہ قرض لینے کی لاگت میں بھی اضافہ ہوا ہے۔

امریکی خزانے پر واجب الادا قرضہ منگل کو قلیل مدتی بانڈز جاری کرنے کے بعد 40,047 ارب ڈالر تک پہنچ گیا، جس کی بنیادی وجوہات میں صحت کی سہولیات، سوشل سکیورٹی سے متعلق قرضوں میں اضافہ اور سود کی بڑھتی ہوئی ادائیگیاں شامل ہیں۔

یہ اضافہ کانگریس کے بجٹ آفس کی توقعات سے بھی زیادہ تیز ہے، جس نے رواں مالی سال کے اختتام تک قرضہ 39,400 ارب ڈالر تک پہنچنے کا اندازہ لگایا تھا۔ یہ صورتحال مشرق وسطیٰ میں جنگ اور توانائی کی قیمتوں میں اضافے سے پیدا ہونے والی مہنگائی کے خدشات کے درمیان سامنے آئی ہے، جس کے باعث قرض لینے کی لاگت کئی برسوں کی بلند ترین سطح پر پہنچ گئی ہے۔

امریکی خزانے کے طویل مدتی (30 سالہ) بانڈز کی شرح منگل کو 2007 کے بعد بلند ترین سطح پر پہنچ گئی، جس کے نتیجے میں حکومت کو اپنی پرانی قرضوں کی دوبارہ ادائیگی کے لیے زیادہ شرح سود پر قرض لینا پڑا، اور یوں مجموعی قرضہ مزید بڑھ گیا۔ بدھ کو محکمہ خزانہ نے ستمبر سے طویل مدتی بانڈز کی دوبارہ خریداری کے بڑے آپریشن کا اعلان کیا، جس سے شرح سود میں کچھ کمی اور سرمایہ کاروں کو اطمینان ملا۔

بروکنگز انسٹیٹیوشن کی بجٹ اور ٹیکس امور کی محقق جیسیکا رِیڈل کے مطابق وفاقی حکومت کا بڑھتا ہوا خسارہ پائیدار نہیں۔ امریکی قرضہ 2008 کے بحران کے بعد سے دوگنا ہو چکا ہے اور اب یہ جی ڈی پی کے تقریباً 125 فیصد تک پہنچ گیا ہے۔ اس وقت خسارہ جی ڈی پی کے 7 سے 8 فیصد کے قریب ہے، جب کہ ماضی میں 3 سے 4 فیصد پر تشویش ظاہر کی جاتی تھی، جس سے مالیاتی منڈیوں میں بے چینی بڑھ گئی ہے۔

ڈیموکریٹ سینیٹر مارک کیلی نے یاد دلایا کہ سابق امریکی صدر ڈونلڈ ٹرمپ نے اپنی پہلی مدت میں قرضہ ختم کرنے کا وعدہ کیا تھا، لیکن وہ اسے 40 ہزار ارب ڈالر پر چھوڑ گئے۔ دوسری جانب ریپبلکن سینیٹر رِک اسکاٹ نے کانگریس سے مطالبہ کیا کہ اخراجات پر قابو پا کر بجٹ کو متوازن بنایا جائے۔ وزیر خزانہ اسکاٹ بیزنٹ نے کہا تھا کہ ان کا ہدف خسارے کو جی ڈی پی کے 3 فیصد تک لانا ہے، تاہم حالیہ عرصے میں خسارہ اس لیے بڑھا کہ فروری میں سپریم کورٹ کے فیصلے کے بعد کمپنیوں کو واپس ملنے والی کسٹم فیس، فوجی اخراجات میں اضافہ (خصوصاً ایران کے ساتھ جنگ کے باعث) اور ٹیکس میں کمی سے خزانے کی آمدنی کم ہوئی۔

ماہرین کا کہنا ہے کہ جی ڈی پی کے مقابلے میں قرضے کی کوئی مخصوص شرح ایسی نہیں جو خود بخود بحران کا باعث بنے، تاہم عوامی سطح پر لیا گیا قرضہ سب سے اہم معاشی اشارہ سمجھا جاتا ہے۔ رِیڈل کے مطابق یہ نفسیاتی اشارے مالیاتی منڈیوں کے لیے خطرے کی گھنٹی ہیں۔ بائی پارٹیزن پالیسی سینٹر کے مالیاتی پالیسی ڈائریکٹر کائیلب کواکینبوش نے بتایا کہ وفاقی حکومت کے قرضے 2007 تا 2009 کے مالیاتی بحران اور پھر کووڈ-19 وبا کے دوران تیزی سے بڑھے، لیکن کانگریس یا امریکی حکومتوں نے اس کا پائیدار حل نہیں نکالا، جس سے آئندہ کسی نئے بحران کی صورت میں سنگین مسائل پیدا ہو سکتے ہیں۔