امریکی فیڈرل ریزرو: شرح سود میں اضافہ مہنگائی پر قابو پانے کے لیے ضروری

امریکی فیڈرل ریزرو کے دو عہدیداروں نے کہا ہے کہ مہنگائی کو 2 فیصد کے ہدف تک واپس لانے کے لیے فوری اقدامات ضروری ہیں۔

خبر رساں ادارے رائٹرز کے مطابق، کلیولینڈ فیڈرل ریزرو کی سربراہ بیتھ ہاماک نے ایک بیان میں کہا کہ مہنگائی گزشتہ پانچ برس سے 2 فیصد سے زائد کی سطح پر برقرار ہے اور وہ پُراعتماد نہیں کہ یہ خودبخود ہدف تک آ جائے گی۔

انہوں نے مزید کہا کہ وفاقی فنڈز کی شرح سود میں اضافہ معاشی سرگرمیوں کو محدود کرنے اور مہنگائی کے دباؤ کو کم کرنے میں مدد دے گا، جبکہ انہوں نے کہا کہ مضبوط لیبر مارکیٹ کے باعث معیشت بلند شرح سود کو برداشت کر سکتی ہے۔

منی ایپلس فیڈرل ریزرو کے سربراہ نیل کاشکاری نے ایک علیحدہ بیان میں مہنگائی پر تشویش کا اظہار کرتے ہوئے کہا کہ مرکزی بینک کو بدھ کے روز شرح سود میں اضافہ کرنا چاہیے تھا اور یہ اقدام آئندہ مزید اضافوں کی پہلی کڑی ہوتا۔

انہوں نے کہا کہ اگر مہنگائی میں کمی آتی ہے تو فیڈرل ریزرو شرح سود میں اضافے کی رفتار کم یا اسے عارضی طور پر روک سکتا ہے، بغیر اس کے کہ حقیقی معیشت پر غیر ضروری اثرات مرتب ہوں۔

ڈلاس فیڈرل ریزرو کی سربراہ لوری لوگان اس ہفتے مرکزی بینک کی شرح سود کو موجودہ 3.50 فیصد سے 3.75 فیصد کے درمیان رینج سے ایک چوتھائی پوائنٹ بڑھانے کی حامی تیسری عہدیدار تھیں۔

شرح سود کو بغیر تبدیلی برقرار رکھنے کے حق میں 9 جبکہ اضافے کے حق میں 3 ووٹ آئے۔