ایران پر متوقع امریکی پابندیاں: تاریخ کی سب سے بڑی معاشی تنہائی

امریکی محکمہ خزانہ نے کہا ہے کہ ایران پر عائد کی جانے والی متوقع پابندیاں دنیا کی سب سے بڑی مربوط معاشی تنہائی کی کارروائی ہوں گی۔

محکمہ کے مطابق ان پابندیوں کا مقصد ایرانی معیشت کی شہ رگ سمجھے جانے والے تیل، مالیات اور تجارت کے راستے بند کرنا ہے۔

امریکی محکمہ خزانہ کی جانب سے تہران پر عائد کی جانے والی پابندیاں ایرانی تیل کی برآمدات روکنے، ان بینکوں اور کمپنیوں کے خلاف کارروائی کرنے اور ان افراد کو پابندیوں کی فہرست میں شامل کرنے پر مرکوز ہیں جو پاسداران انقلاب یا حزب اللہ سے منسلک ہیں اور ایران کو رقوم کی منتقلی میں سہولت فراہم کرتے ہیں۔

امریکہ ایران پر معاشی دباؤ برقرار رکھنا چاہتا ہے تاکہ تہران کو مذاکرات کی میز پر لایا جا سکے اور وہ آبنائے ہرمز میں بین الاقوامی بحری نقل و حمل کو بغیر کسی رکاوٹ یا محصول کے قبول کرے۔