امریکہ، ایران مذاکرات کے غیریقینی میں تیل کی قیمتوں میں اضافہ

تیل کی قیمتوں میں آج معمولی اضافہ ہوا ہے، جب کہ گزشتہ سیشن میں ان میں نمایاں کمی دیکھی گئی تھی۔ یہ اضافہ مشرق وسطیٰ سے تیل کی فراہمی کو لاحق خطرات کے خدشات کے باعث ہوا ہے۔

برینٹ خام تیل کے قریب ترین ماہ کی ڈیلیوری کے سودے 0.62 ڈالر یا 0.7 فیصد اضافے کے ساتھ 84.39 ڈالر فی بیرل تک پہنچ گئے، جبکہ گزشتہ سیشن میں ان میں 7 فیصد کمی آئی تھی اور یہ تین ہفتوں کی کم ترین سطح پر آ گئے تھے۔

امریکی ویسٹ ٹیکساس انٹرمیڈیٹ خام تیل کی قیمت بھی 0.61 ڈالر یا 0.7 فیصد بڑھ کر 80.95 ڈالر فی بیرل ہو گئی، جبکہ گزشتہ سیشن میں اس میں 5 فیصد سے زائد کمی ہوئی تھی اور یہ تقریباً ایک ہفتے کی کم ترین سطح پر آ گیا تھا۔

قیمتوں میں یہ کمی اس وقت آئی جب امریکی صدر ڈونلڈ ٹرمپ نے اتوار کو اعلان کیا کہ وہ ایران پر نئی کارروائیاں اس وقت تک مؤخر کر رہے ہیں جب تک دونوں ممالک کے درمیان جاری مذاکرات مکمل نہیں ہو جاتے اور آبنائے ہرمز پر کنٹرول کے تنازعے کا حل نہیں نکل آتا۔

خبر رساں ایجنسی 'رائٹرز' کے مطابق، کے سی ایم ٹریڈ کے چیف مارکیٹ اینالسٹ ٹِم واٹرر نے کہا کہ قیمتوں میں کمی کا رجحان اب بھی غیر مستحکم ہے— اگر خطے میں دوبارہ میزائل حملے شروع ہو گئے یا آبنائے ہرمز کے قریب تیل بردار جہازوں پر دوبارہ حملے ہوئے تو تیل کی قیمتیں فوری طور پر بلند سطح پر جا سکتی ہیں۔