جرمنی کو شدید گرمی اور خشک سالی سے 36 ارب یورو کا نقصان

ماحولیات کی بین الاقوامی تنظیم گرین پیس کی تازہ رپورٹ کے مطابق رواں سال گرمیوں میں جرمنی کو شدید گرمی کی لہر اور خشک سالی کے باعث ملکی معیشت کو کم از کم 36 ارب یورو (تقریباً ایک فیصد جی ڈی پی) کا نقصان برداشت کرنا پڑا۔

تنظیم کے بیان میں کہا گیا ہے کہ یہ نقصانات کئی اہم شعبوں تک پھیلے ہوئے ہیں، جن میں لیبر مارکیٹ، ٹرانسپورٹ، صحت، زراعت، جنگلات اور تعلیم شامل ہیں۔ شدید گرمی اور خشک سالی نے معیشت، بنیادی ڈھانچے اور عوامی خدمات پر اضافی بوجھ ڈالا۔

رپورٹ کے مطابق خشک سالی کے باعث صرف جنگلات کو 7.5 ارب یورو جبکہ زرعی شعبے کو 3.4 ارب یورو کا نقصان پہنچا۔

تنظیم نے یہ بھی واضح کیا کہ ان تخمینوں میں جنگلاتی آگ سے ہونے والے تمام ماحولیاتی نقصانات شامل نہیں، جن میں حیاتیاتی تنوع کا نقصان، پینے کے پانی کے ذخائر کی حفاظت میں کمی، مٹی کے کٹاؤ میں اضافہ اور مقامی آب و ہوا کو منظم کرنے کی جنگلاتی صلاحیت کی کمی شامل ہیں۔