ایرانی حکومت کے لیے پٹرول کی قیمتیں بڑھانا ناگزیر: ماہر

سیاسی امور کے ماہر ڈاکٹر محمد عباس ناجی نے کہا ہے کہ تہران میں پٹرول کی قیمتیں بڑھانا اب ناگزیر ہو چکا ہے۔

ناجی نے 'العربیہ ایف ایم' سے گفتگو میں کہا کہ ایرانی حکومت ایک سنگین مسئلے سے دوچار ہے، جس کے باعث اسے ایندھن کی قیمتیں بڑھانا پڑ رہی ہیں۔ اس کے ساتھ ہی ایندھن کی فراہمی کو محدود کرنے کا رجحان بھی سامنے آیا ہے اور پٹرول پمپوں پر گاڑیوں کی قطاریں دیکھی جا رہی ہیں۔

انہوں نے مزید کہا کہ اگر ایران میں ایندھن کی قیمتیں بڑھائی گئیں تو اس سے عوامی ناراضی میں اضافہ ہوگا اور آئندہ مرحلے میں ملک میں نئے احتجاجات بھڑک سکتے ہیں۔

سیاسی ماہر نے مزید کہا کہ امریکی بحری پابندیوں، معاشی دباؤ اور حالیہ امریکی تادیبی اقدامات کے ساتھ ساتھ ایران کی بنیادی تنصیبات پر امریکی حملوں کے باعث ایرانی حکومت کے پاس ایندھن کے حوالے سے کوئی اور راستہ نہیں بچا۔

واضح رہے کہ ایران اس وقت افراط زر میں اضافے اور قومی کرنسی کی قدر میں کمی کے بحران سے دوچار ہے، جس کی وجہ ایرانی حکومت کا امریکہ کے ساتھ مذاکرات کے حوالے سے سخت موقف اور آبنائے ہرمز کھولنے کے لیے پیشگی شرائط پر اصرار ہے۔