ایمرجنسی نقدی کے باعث یورپ میں کرنسی نوٹوں کا استعمال بڑھ گیا

تازہ اعداد و شمار سے ظاہر ہوتا ہے کہ یورپی یونین میں گردش کرنے والے کرنسی نوٹوں کی تعداد مسلسل بڑھ رہی ہے، حالانکہ اسمارٹ فون کے ذریعے ادائیگیوں کا رجحان وسیع پیمانے پر پھیل چکا ہے۔ اس کی بڑی وجہ جنگلاتی آگ سمیت ہنگامی حالات کے پیش نظر 'ایمرجنسی نقدی' رکھنے کا بڑھتا ہوا رجحان ہے۔

برطانوی اخبار 'گارڈین' کے مطابق، یورپی مرکزی بینک کے چیف اکانومسٹ فلیپ لین کا کہنا ہے کہ روزمرہ لین دین میں نقد رقم کا استعمال کم ہو رہا ہے، لیکن گردش میں موجود کرنسی نوٹوں کی مقدار میں اضافہ ہو رہا ہے۔ ماہرین اس رجحان کو جنگوں اور سائبر حملوں کے خدشات سے جوڑتے ہیں، جو الیکٹرانک ادائیگی کے نظام کو متاثر کر سکتے ہیں۔

گزشتہ سال برطانیہ میں مارکس اینڈ اسپنسر کمپنی کو ایک بڑے سائبر حملے کا سامنا کرنا پڑا، جس سے اس کے آن لائن آرڈرز کئی ہفتے متاثر رہے۔ سن 2025 میں یورپی یونین کے شہریوں کو ہدایت دی گئی تھی کہ وہ جنگلاتی آگ، سیلاب، طوفان یا سائبر حملوں کی صورت میں 72 گھنٹے کے لیے ضروری اشیا اور نقد رقم محفوظ رکھیں۔

یورپی مرکزی بینک کے اعداد و شمار کے مطابق، گردش میں موجود کرنسی نوٹوں کی مالیت 2016 میں تقریباً ایک ٹریلین یورو سے بڑھ کر جون 2026 میں 1.6 ٹریلین یورو تک پہنچ گئی۔ اسی طرح نوٹوں کی تعداد 2019 میں 24 ملین سے بڑھ کر 31 ملین ہو گئی، جبکہ 2025 میں 50 یورو کے نوٹ سب سے زیادہ استعمال ہوئے، اس کے بعد 100 یورو کے نوٹ کا نمبر آیا۔

جرمنی، آسٹریا، فن لینڈ، سویڈن اور نیدرلینڈز سمیت یورپی ممالک نے شہریوں کو ہدایت کی ہے کہ وہ ایمرجنسی کے لیے 70 سے 100 یورو نقد رقم اپنے پاس رکھیں۔