اوپیک پلس کا ستمبر میں تیل کی پیداوار بڑھانے کا اعلان

اوپیک پلس اتحاد نے اعلان کیا ہے کہ ستمبر میں تیل کی یومیہ پیداوار کا کوٹہ 1 لاکھ 88 ہزار بیرل بڑھا دیا جائے گا۔

بیان میں ان پیداوار پالیسیوں کا ذکر نہیں کیا گیا جن پر 2026 کے آخری تین ماہ کے لیے اتفاق ہو سکتا ہے۔

اوپیک پلس کے سات اہم رکن ممالک نے اس سال کے بیشتر حصے میں ماہانہ پیداوار بڑھانے پر اتفاق کیا تھا، تاہم ایران اور یوکرین کی جنگوں کے باعث خلیجی ممالک، روس اور قازقستان کی برآمدات متاثر رہیں، جس کے سبب یہ اضافہ زیادہ تر کاغذی رہا۔ ان سات ممالک میں سعودی عرب، روس، عراق، کویت، الجزائر، قازقستان اور عمان شامل ہیں۔

اوپیک پلس کے ایک مندوب اور اتحاد کے ایک ذریعے نے بتایا کہ غالب امکان ہے کہ ستمبر کے بعد باقی سال کے لیے پیداوار میں اضافے کو معطل کر دیا جائے گا، جبکہ اتحاد میں نئی پیداوار کوٹہ پر مشکل مذاکرات متوقع ہیں۔

ستمبر میں ہونے والا یہ اضافہ 16 لاکھ 50 ہزار بیرل یومیہ کی اس کمی کو بتدریج ختم کر دے گا، جس پر 2023 میں اتفاق ہوا تھا، اس وقت گروپ میں متحدہ عرب امارات بھی شامل تھا، جو مئی میں اوپیک سے الگ ہو گیا تھا۔

اوپیک پلس اس وقت رکن ممالک کی تیل پیداوار کی صلاحیت کا جائزہ لے رہا ہے، تاکہ 2027 کے لیے پیداوار کی بنیادیں اور کوٹے طے کیے جا سکیں۔

ستمبر کے بعد اضافے کی معطلی سے 2022 میں کی گئی تقریباً 20 لاکھ بیرل یومیہ کی کمی برقرار رہے گی، جب تک گروپ ارکان کے لیے اضافی کوٹے کا فیصلہ نہیں کرتا۔

اتحاد کے بعض ارکان، جیسے عراق، اپنی زیادہ پیداواری صلاحیت کے پیش نظر انفرادی کوٹے میں اضافے کے لیے دباؤ ڈال رہے ہیں۔