سعودی عرب دنیا کی بڑی اور تیزی سے بڑھتی ہوئی منڈی ہے: وزیر سرمایہ کاری

وزیر سرمایہ کاری فہد بن عبدالجلیل بن علی آل سیف نے کہا ہے کہ سعودی عرب دنیا کی سب سے اہم اور تیزی سے ترقی کرنے والی منڈیوں میں سے ایک ہے۔ انہوں نے کہا کہ مملکت نے سیکڑوں کمپنیوں کو سرمایہ کاری کے لیے اپنی جانب متوجہ کیا ہے، جبکہ سعودی معیشت کی مضبوطی عالمی کمپنیوں کے لیے ایک مستحکم راستہ فراہم کرتی ہے۔

وزیر موصوف نے پیرس میں سعودی-فرانسیسی سرمایہ کاری راؤنڈ ٹیبل اجلاس کے دوران کہا کہ مملکت میں سرمایہ کاری کے لیے کئی امید افزا اور مستحکم شعبے موجود ہیں۔ انہوں نے واضح کیا کہ سعودی معیشت اب فرانسیسی کمپنیوں کے لیے بھی وسیع مواقع فراہم کر رہی ہے۔

آل سیف نے نشاندہی کی کہ سعودی مالیاتی منڈی دنیا کی سب سے زیادہ پھیلتی ہوئی منڈیوں میں سے ہے اور یہ کہ سعودی منڈی دنیا بھر کے سرمایہ کاروں کے لیے کھلی ہے۔

انہوں نے کہا کہ فرانس مملکت کے اہم ترین تجارتی شراکت داروں میں شامل ہے اور سعودی عرب میں براہ راست غیر ملکی سرمایہ کاری کے سب سے بڑے ذرائع میں چوتھے نمبر پر ہے۔

انہوں نے مزید بتایا کہ گزشتہ برس فرانسیسی سرمایہ کاری کے تحت سعودی منڈی میں لاکھوں یورو کی سرمایہ کاری کی گئی، جس سے فرانس مملکت میں چوتھا بڑا سرمایہ کار بن گیا ہے۔

وزیر سرمایہ کاری نے اس بات کی بھی تصدیق کی کہ تیل و گیس کا شعبہ ان اہم شعبوں میں شامل ہے جو سعودی عرب اور فرانس کے درمیان تعلقات کے فروغ سے سب سے زیادہ فائدہ اٹھائیں گے، خاص طور پر ان سرمایہ کاری کے مواقع کے پیش نظر جو مملکت فرانسیسی کمپنیوں کے لیے فراہم کر رہی ہے۔