امیر تبوک آج زرعی مصنوعات میلہ کا افتتاح کریں گے

امیر تبوک شہزادہ فہد بن سلطان بن عبدالعزیز آج بدھ کو تبوک ریجن میں زرعی مصنوعات میلہ 2026 کا افتتاح کریں گے۔ یہ میلہ وزارت ماحولیات، پانی و زراعت کے مقامی دفتر کے زیر اہتمام منعقد ہو رہا ہے اور تین روز تک جاری رہے گا۔ میلہ تبوک شہر کے واجہۃ الشمال نمائش و کانفرنس سینٹر میں منعقد کیا جائے گا۔

اس میلے کا مقصد تبوک ریجن کی معروف زرعی مصنوعات کو اجاگر کرنا، مقامی کسانوں اور پیداوار کنندگان کی حوصلہ افزائی اور انہیں اپنی مصنوعات پیش کرنے اور فروخت کرنے کا موقع فراہم کرنا ہے۔ اس کے ساتھ ساتھ زرعی شعبے کی اہمیت اور اس کے غذائی تحفظ و پائیدار ترقی میں کردار کے بارے میں آگاہی بڑھانا بھی اس میلے کا حصہ ہے۔

تبوک ریجن میں وزارت ماحولیات، پانی و زراعت کے ڈائریکٹر انجینئر امجد بن عبداللہ ثلاب نے کہا کہ زرعی شعبے کو امیر تبوک کی جانب سے بھرپور سرپرستی حاصل ہے۔ انہوں نے کہا کہ امیر تبوک کی جانب سے میلے کا افتتاح مقامی کسانوں اور پیداوار کنندگان کی حوصلہ افزائی اور زرعی مصنوعات کی مارکیٹنگ کے فروغ میں ان کی دلچسپی کا مظہر ہے، جو اس شعبے کی ترقی اور سعودی وژن 2030 کے اہداف کے حصول میں معاون ہے۔ انہوں نے مزید کہا کہ یہ میلہ ایک اہم مارکیٹنگ پلیٹ فارم ہے جو کسانوں، پیداوار کنندگان اور صارفین کو یکجا کرتا ہے، تبوک کی معیاری اور متنوع زرعی مصنوعات کو اجاگر کرتا ہے اور کسانوں کے لیے اپنی مصنوعات متعارف کرانے اور فروخت کرنے کے وسیع مواقع فراہم کرتا ہے۔