چین میں سعودی سرمایہ کاری میں 343 فیصد سے زائد اضافہ

رواں سال کے ابتدائی سات ماہ میں چین میں سعودی سرمایہ کاری میں نمایاں اضافہ ہوا ہے۔

العربیہ کے مطابق، مملکت سے آنے والی حقیقی سرمایہ کاری میں سالانہ بنیاد پر 343.7 فیصد اضافہ ریکارڈ کیا گیا، جو چینی منڈی میں سعودی سرمایہ کاروں کی بڑھتی ہوئی موجودگی کی عکاسی کرتا ہے۔

چینی وزارت تجارت کے اعداد و شمار کے مطابق، فرانس سے آنے والی سرمایہ کاری میں 36.1 فیصد اور جنوبی کوریا سے 15.8 فیصد اضافہ ہوا، جس میں فری زونز کے ذریعے ہونے والی سرمایہ کاری بھی شامل ہے۔

وزارت کے مطابق، سال کے پہلے سات ماہ میں چین میں غیر ملکی سرمایہ کاری سے 37,711 نئی کمپنیاں قائم ہوئیں، جو سالانہ بنیاد پر 4.4 فیصد زیادہ ہیں۔ اس دوران مینوفیکچرنگ سیکٹر میں 61.1 ارب سعودی ریال (16.3 ارب ڈالر) جبکہ خدمات کے شعبے میں 178.6 ارب سعودی ریال (47.6 ارب ڈالر) کی براہ راست غیر ملکی سرمایہ کاری ہوئی۔

اعلیٰ ٹیکنالوجی کی صنعتوں میں بھی نمایاں کارکردگی دیکھی گئی، جہاں غیر ملکی سرمایہ کاری میں 32.7 فیصد سالانہ اضافہ ہوا اور یہ 101.8 ارب سعودی ریال (27.1 ارب ڈالر) تک پہنچ گئی، جو ملک میں استعمال ہونے والی مجموعی غیر ملکی سرمایہ کاری کا 41.6 فیصد بنتی ہے، جو گزشتہ سال کے مقابلے میں 12.2 فیصد پوائنٹس زیادہ ہے۔

اسی طرح تحقیق و ترقی اور ڈیزائن کی خدمات سب سے تیزی سے ترقی کرنے والے شعبے رہے، جہاں غیر ملکی سرمایہ کاری میں 72.1 فیصد اضافہ ہوا، جبکہ سائنسی و تکنیکی کامیابیوں کی منتقلی کی خدمات میں 62.2 فیصد اور الیکٹرانکس و مواصلاتی آلات کی تیاری میں 39.9 فیصد اضافہ ریکارڈ کیا گیا۔