عالمی منڈی میں تیل کی قیمتوں میں کمی، برینٹ 86.89 ڈالر فی بیرل

تیل کی قیمتوں میں آج منگل کے روز کمی کا سلسلہ جاری رہا اور فی بیرل قیمت میں ایک ڈالر سے زائد کی کمی ریکارڈ کی گئی۔ اس کمی کی وجہ امریکا اور ایران کے درمیان جنگ کے حل کی امیدیں بتائی جا رہی ہیں۔

برینٹ خام تیل کے سودے 1.47 ڈالر یعنی 1.66 فیصد کمی کے ساتھ 86.89 ڈالر فی بیرل پر آ گئے، جو 20 جولائی کے بعد کم ترین سطح ہے۔ امریکی ویسٹ ٹیکساس انٹرمیڈیٹ خام تیل کی قیمت 1.45 ڈالر یا 1.76 فیصد کمی کے بعد 81.16 ڈالر فی بیرل رہی، جو کہ 20 جولائی کے بعد اس کی بھی کم ترین سطح ہے۔

اس سے قبل دونوں معاہدوں میں گزشتہ سیشن کے دوران تقریباً 8 فیصد کی کمی دیکھی گئی، جب امریکا نے ہفتے کے آغاز میں ایران کے خلاف فضائی حملے اچانک معطل کر دیے تھے۔

خبر رساں ادارے 'رائٹرز' کے مطابق، آئی جی کے تجزیہ کار ٹونی سیکامور نے اپنے کلائنٹس کو ایک نوٹ میں کہا کہ 'فی الحال، تصفیے کی امید نے قیمتوں کو پرسکون کیا ہے اور سعودی انفراسٹرکچر پر حوثیوں کے حملوں کے خدشات میں کمی آئی ہے، تاہم صورتحال اب بھی خاصی غیر یقینی ہے۔'