فرانس میں غیر یورپی سرمایہ کاری پر سخت پابندیاں عائد

فرانسیسی وزیر اعظم سیباستین لوکورنو نے گزشتہ روز اتوار کو ایک حکم نامہ جاری کیا ہے جس کے تحت فرانسیسی کمپنیوں میں غیر یورپی غیر ملکی سرمایہ کاری پر نگرانی مزید سخت کر دی گئی ہے۔ اس اقدام کا مقصد قومی سلامتی کے تحفظ کو مضبوط بنانا ہے۔

حکم نامے کے مطابق، اب یورپی یونین سے باہر کے کسی بھی سرمایہ کار کے لیے لازم ہوگا کہ وہ کسی حساس شعبے میں کام کرنے والی فرانسیسی کمپنی کے 10 فیصد یا اس سے زیادہ حصص خریدنے سے پہلے حکومتی منظوری حاصل کرے، چاہے کمپنی فرانس میں درج ہو یا بیرون ملک۔

اس فیصلے کے تحت حکومتی جانچ پڑتال کی کم از کم حد 25 فیصد ووٹنگ رائٹس سے کم کر کے 10 فیصد حصص کر دی گئی ہے۔ اس کا مقصد ان "موقع پرستانہ خریداریوں" کو روکنا ہے جو یورپی یونین سے باہر درج فرانسیسی کمپنیوں کو نشانہ بنا سکتی ہیں اور قومی سلامتی کے لیے خطرہ بن سکتی ہیں۔

حکم نامے میں وضاحت کی گئی ہے کہ یہ نئی پابندیاں جیو پولیٹیکل کشیدگی کے تناظر میں متعارف کرائی گئی ہیں اور ان کا مقصد فرانسیسی سلامتی سے جڑی کمپنیوں اور اسٹریٹجک ٹیکنالوجیز کا تحفظ یقینی بنانا ہے۔

کمپنیوں کی مالیاتی منڈیوں سے سرمایہ حاصل کرنے کی صلاحیت متاثر نہ ہو، اس کے لیے وزارت خزانہ درخواست جمع ہونے کے 10 دن کے اندر فیصلہ کرے گی کہ آیا اس سودے کی مزید جانچ ضروری ہے یا نہیں۔

نئے قواعد رواں ماہ کے آخر میں نافذ العمل ہو جائیں گے۔