سعودی عرب میں پانچ علاقوں میں 1 لاکھ 67 ہزار جائیدادوں کی رجسٹریشن کا آغاز

سجل عقاری نے آج اعلان کیا ہے کہ مملکت کے پانچ علاقوں میں 1 لاکھ 67 ہزار 352 جائیدادوں کی پہلی بار عینی رجسٹریشن کے لیے درخواستیں وصول کی جا رہی ہیں۔ ان علاقوں میں ریاض، قصیم، تبوک، حائل اور مشرقی علاقہ شامل ہیں۔

سجل عقاری کے مطابق ریاض ریجن کے مختلف محلوں اور اضلاع میں رجسٹریشن کا عمل شروع ہو چکا ہے، جن میں بجادیہ، الجمش، الاحمر، البدیع، الحریق، الحصاة، الدوادمی، الحلوہ، نفی، عفیف، ساجر، السر، حلبان، حوطہ بنی تمیم، المجمعة اور دیگر کئی علاقے شامل ہیں۔

دیگر علاقوں میں تبوک ریجن کے بئر ابن هرماس، حائل شہر اور قصیم ریجن کے العمار اور الظاہریہ میں بھی رجسٹریشن کا آغاز ہو گیا ہے۔ مشرقی علاقے میں صداوی گاؤں اور الرفیعہ قصبہ بھی اس مرحلے میں شامل ہیں۔

سجل عقاری نے ان تمام مخصوص محلوں میں موجود جائیدادوں کے مالکان سے اپیل کی ہے کہ وہ اپنی جائیدادیں جمعرات 5 نومبر 2026 کے اختتام سے قبل سجل عقاری کی الیکٹرانک پلیٹ فارم (www.rer.sa) یا موبائل ایپ کے ذریعے رجسٹر کرائیں۔ مزید معلومات کے لیے کسٹمر سروس سینٹر کے نمبر 199002 پر بھی رابطہ کیا جا سکتا ہے۔

رجسٹریشن کی تفصیلات اور مقاصد

سجل عقاری نے بتایا کہ رجسٹریشن کے لیے محلوں کا انتخاب مخصوص معیار کے مطابق کیا گیا ہے اور مستقبل میں مزید علاقوں اور اضلاع کا اعلان بھی کیا جائے گا۔ مالکان کو ہدایت کی گئی ہے کہ مقررہ مدت میں رجسٹریشن مکمل کریں تاکہ سجل کی خدمات اور جائیداد کی منتقلی کے عمل سے بآسانی فائدہ اٹھایا جا سکے اور نظام میں درج جرمانوں سے بچا جا سکے۔

سجل نے مزید کہا کہ ہر رجسٹرڈ جائیداد کو ایک منفرد "عقار نمبر" اور ملکیتی سرٹیفکیٹ جاری ہو گا، جس میں جغرافیائی محل وقوع، مالک کی معلومات، جائیداد کی تفصیل اور اس کے حقوق و ذمہ داریاں شامل ہوں گی، اس سے ملکیت اور حقوق کی دستاویزی حیثیت مضبوط ہو گی۔

اسی حوالے سے وضاحت کی گئی کہ عمومی نگرانی کی ذمہ داری جنرل اتھارٹی فار ریئل اسٹیٹ کے پاس ہے، جبکہ نیشنل کمپنی فار ریئل اسٹیٹ رجسٹریشن سروسز جدید ٹیکنالوجی اور جیو اسپیشل ڈیٹا کے ذریعے اس عمل کو ڈیجیٹل پلیٹ فارم پر انجام دے رہی ہے، جس سے رئیل اسٹیٹ سیکٹر میں شفافیت اور اعتماد کو فروغ ملے گا۔