خلیجی اسمارٹ انویسٹر ایوارڈ: 44 فاتحین کو 15 لاکھ ریال سے زائد انعامات

خلیج تعاون کونسل کے سیکریٹری جنرل جاسم بن محمد البدیوی اور سعودی مالیاتی مارکیٹ اتھارٹی کے نائب چیئرمین یوسف بن حمد البلیہد نے خلیجی اسمارٹ انویسٹر ایوارڈ کے چوتھے سیزن میں 44 فاتحین کو انعامات سے نوازا، جن کی مجموعی مالیت 15 لاکھ سعودی ریال سے زائد رہی۔

ریاض میں منعقدہ اس تقریب میں ایوارڈ کے چار شعبوں — ویڈیو، مصوری، فوٹوگرافی اور تحریر — میں فاتحین کو اعزازات دیے گئے۔ ہر شعبے میں انفرادی اور یونیورسٹی طلبہ کی دو کیٹیگریز میں تین تین جبکہ اسکول طلبہ کی کیٹیگری میں پانچ پانچ فاتحین شامل تھے۔

اس سال مقابلے میں گزشتہ سیزن کے مقابلے میں زیادہ جوش و خروش دیکھنے میں آیا، اور اس بار 3 لاکھ سے زائد شرکاء نے حصہ لیا، جبکہ تیسرے سیزن میں یہ تعداد 88 ہزار سے کچھ زیادہ تھی۔

خلیجی اسمارٹ انویسٹر ایوارڈ، خلیجی سرمایہ کاری آگاہی پروگرام 'ملم' کی ایک اہم پہل ہے، جس کا مقصد خلیجی ممالک میں مالیاتی لین دین کی ثقافت اور آگاہی کو فروغ دینے کے لیے تخلیقی مواد کی تیاری کی حوصلہ افزائی کرنا ہے۔

ایوارڈ میں انفرادی، یونیورسٹی اور اسکول طلبہ کو چاروں شعبوں میں شرکت کا موقع دیا گیا، تاکہ مالیاتی شعور اور سرمایہ کاری و بچت کی اہمیت پر آگاہی کو عام کیا جا سکے۔

واضح رہے کہ 'ملم' پروگرام خلیج تعاون کونسل کے سیکریٹریٹ کے تحت شروع کیا گیا، جس میں خلیجی ممالک کی مالیاتی مارکیٹ اتھارٹیز شریک ہیں۔ اس پروگرام کے ذریعے مالیاتی لین دین اور سرمایہ کاری کے شعور کو اجاگر کرنے کے لیے مختلف آگاہی مہمات اور تقریبات منعقد کی جاتی ہیں۔