پیرس میں سعودی-فرانسیسی سرمایہ کاری اجلاس آج منعقد ہوگا

سعودی ولی عہد اور وزیراعظم شہزادہ محمد بن سلمان بن عبدالعزیز آل سعود کی فرانس آمد کے موقع پر پیرس میں آج پیر کو سعودی-فرانسیسی سرمایہ کاری کے حوالے سے گول میز اجلاس منعقد ہو رہا ہے، جس کا اہتمام وزارت سرمایہ کاری نے کیا ہے۔ اس اجلاس میں دونوں ممالک کے اعلیٰ حکومتی عہدیدار، کاروباری رہنما اور بڑی کمپنیوں کے سربراہان شریک ہوں گے۔

اجلاس میں کاروباری رہنماؤں کے درمیان صنعتی شراکت داری، ٹرانسپورٹ اور لاجسٹکس، مصنوعی ذہانت، ڈیجیٹل انفراسٹرکچر سمیت مختلف شعبوں میں اسٹریٹجک مذاکرات ہوں گے۔ اس کے علاوہ مختلف شعبوں میں کئی معاہدوں اور مفاہمتی یادداشتوں پر دستخط بھی کیے جائیں گے۔

یہ اجلاس سعودی عرب اور فرانس کے درمیان بڑھتے ہوئے اقتصادی و سرمایہ کاری تعلقات کا تسلسل ہے، جس کا مقصد تعاون کے نئے مواقع پیدا کرنا، دونوں ممالک کے کاروباری حلقوں کے درمیان شراکت داری کو فروغ دینا اور مشترکہ مفادات کے تحت نمایاں سرمایہ کاری و منصوبوں کو عملی جامہ پہنانا ہے۔