امریکا اور چین کی تانبے پر مسابقت، عالمی مارکیٹ دباؤ میں

عالمی تانبہ مارکیٹ میں سپلائی چینز پر دباؤ میں اضافہ دیکھا جا رہا ہے، جہاں ایک طرف امریکہ میں تانبے کی ریکارڈ ذخیرہ اندوزی جاری ہے تو دوسری جانب چین کی جانب سے اس دھات کی طلب میں نمایاں اضافہ ہوا ہے۔ یہ صورتحال دنیا کی دو بڑی معیشتوں کے درمیان تانبے کی فراہمی کے حصول کی مسابقت کو ظاہر کرتی ہے۔

اسی حوالے سے خبر رساں ادارے بلومبرگ نے بتایا کہ اس مقابلے سے عالمی مارکیٹ پر دباؤ بڑھ گیا ہے، اور اگر امریکہ اور چین مزید تانبہ خریدتے رہے تو دیگر مارکیٹوں میں اس کی دستیابی کم ہو سکتی ہے اور قیمتیں ریکارڈ سطح تک پہنچ سکتی ہیں۔

بلومبرگ کے مطابق، تانبے کی اس دوڑ سے مارکیٹ پر دباؤ اور قیمتوں میں مزید اضافے کا خدشہ ہے، خاص طور پر اس وقت جب ذخائر کم ہو رہے ہیں اور توانائی، صنعت اور ٹیکنالوجی کے شعبوں میں اس دھات کی طلب بڑھ رہی ہے۔

بلومبرگ نے مزید کہا کہ اگرچہ تانبے کی قیمتیں روایتی طور پر صنعتی نمو کے ادوار سے جڑی رہی ہیں، تاہم اس بار قیمتوں میں تیزی زیادہ تر عالمی تجارتی نظام میں ساختی بگاڑ اور امریکی تجارتی پالیسیوں میں غیر یقینی صورتحال کے باعث ہے۔ اس کے علاوہ، تانبے کی کان کنی میں استعمال ہونے والے کیمیکلز کی سپلائی میں بھی خلل آیا ہے، جیسا کہ حالیہ عالمی اقتصادی رپورٹس میں بتایا گیا ہے۔

بلومبرگ کے مطابق، لندن میٹل ایکسچینج میں تانبے کے فیوچر کنٹریکٹس کی قیمت 14 ہزار ڈالر فی ٹن سے تجاوز کر گئی ہے، جبکہ ماہرین کا خیال ہے کہ قیمتیں جلد ہی اس سال کے آغاز میں چین کی خریداری کے دوران بننے والے 14,500 ڈالر کے ریکارڈ سے بھی آگے جا سکتی ہیں۔

دوسری جانب، امریکی کومیکس ایکسچینج میں ستمبر کے تانبہ کنٹریکٹس کی قیمت 6.70 ڈالر فی پاؤنڈ کی بلند ترین سطح پر پہنچ گئی، جو سال کے آغاز سے اب تک تقریباً 17 فیصد اور گزشتہ بارہ ماہ میں 50 فیصد اضافہ ہے۔

ماہرین کے مطابق، اس وقت مارکیٹ میں تیزی کی ایک بڑی وجہ امریکی انتظامیہ کی جانب سے ریفائنڈ تانبے کی درآمدات پر مجوزہ ڈیوٹی کے فیصلے کا انتظار ہے، جو 30 جون کو متوقع تھا مگر ابھی تک نہیں آیا۔ اس تجویز کے تحت جنوری 2027 سے 15 فیصد اور ایک سال بعد 30 فیصد ڈیوٹی عائد کی جا سکتی ہے۔ اسی خدشے کے پیش نظر امریکی درآمد کنندگان نے تانبے کی ذخیرہ اندوزی میں تیزی کر دی ہے۔

کسٹمز کے اعداد و شمار کے مطابق، صرف جولائی میں امریکی بندرگاہوں پر دو لاکھ میٹرک ٹن سے زائد تانبہ آیا، جو 2014 کے بعد سب سے زیادہ ماہانہ درآمد ہے۔

واضح رہے کہ تانبے کی مارکیٹ میں یہ کشیدگی امریکی اقدامات کے وسیع تر تناظر میں سامنے آئی ہے، جہاں امریکی محکمہ تجارت نے 27 اگست سے ٹنگسٹن اسکریپ اور لیتھیم بیٹریوں کے فضلے کی برآمد پر پابندی عائد کر دی ہے۔ اس اقدام کا مقصد مقامی ری سائیکلنگ صنعت کو فروغ دینا اور چین پر انحصار کم کرنا ہے۔ اس کے علاوہ، امریکی انتظامیہ نے سولر پینلز اور سیمی کنڈکٹرز میں استعمال ہونے والے پولی سیلیکون مصنوعات پر 15 فیصد ڈیوٹی اور کم از کم قیمت مقرر کرنے کا عندیہ بھی دیا ہے، جس سے چینی سولر کمپنیوں کے حصص متاثر ہوئے ہیں۔