امریکی وزیر خزانہ کا ایران کے خلاف 'اقتصادی بائیکاٹ' شروع کرنے کا اعلان

امریکی وزیر خزانہ اسکاٹ بیسنٹ نے ایران کے خلاف 'اقتصادی بائیکاٹ' مہم شروع کرنے کا اعلان کیا ہے۔

امریکی وزیر نے مزید کہا کہ جو بھی ایران کے ساتھ کھڑا ہوگا یا اس سے معاشی تعلقات رکھے گا، اس کے خلاف کارروائی کی جائے گی۔ ان کا کہنا تھا کہ ایران اب بھی 'امریکا مردہ باد' کا نعرہ لگاتا ہے اور وہ ہمارے اور ہمارے اتحادیوں کے خلاف حالت جنگ میں ہے۔

انہوں نے کہا کہ امریکا ایرانی پاسداران انقلاب کے ہر ممکنہ مالی ذریعے کو بند کرے گا۔ امریکی صدر ڈونلڈ ٹرمپ نے بعض ممالک سے ایران کے ساتھ لین دین روکنے کا مطالبہ کیا ہے اور ہمیں توقع ہے کہ دیگر ممالک بھی اس حوالے سے اقدامات کریں گے۔

وزیر خزانہ نے مزید بتایا کہ ٹرمپ عالمی رہنماؤں سے فون پر رابطے کر رہے ہیں تاکہ ایران سے معاشی تعلقات منقطع کیے جائیں۔ ہم نے وہ عمومی لائسنس معطل کر دیے ہیں جو ایران کو کچھ مالیاتی منتقلیوں کی اجازت دیتے تھے۔ ہماری پابندیوں کا ہدف ایران کے ڈیجیٹل اثاثے، ٹیکنالوجی، سونا، ہوابازی اور شپنگ سیکٹر ہیں۔