عمان کے ساحل کے قریب تیل رساؤ کی تفصیلات جاری

سلطنت عمان کی حکام نے پیر کے روز بتایا کہ ان کے ساحل کے قریب تقریباً 390 مربع کلومیٹر کے رقبے پر تیل کا رساؤ ہوا ہے، جو ایک روسی خام تیل لے جانے والے اور پابندیوں کی زد میں آئے جہاز کو نقصان پہنچنے کے بعد پیش آیا۔

دو بحری سکیورٹی ذرائع کے مطابق، جہاز 'کارولین بیزنجی' کے عملے نے پہلی بار آٹھ جون کو یمن کے جنوبی علاقے میں واقع المکلا بندرگاہ کے قریب اس مسئلے کی اطلاع دی۔ ابتدائی جائزوں میں جہاز پر دھماکے کا امکان ظاہر کیا گیا ہے۔

عمان نے پیر کو پہلی بار اس ماحولیاتی اثرات کی تفصیلات جاری کرتے ہوئے کہا ہے کہ وہ ظفار کے ساحل کے قریب حلانیات جزیروں کے نزدیک اپنے پانیوں میں تیل کے اس رساؤ کو روکنے کے لیے بھرپور کوشش کر رہی ہے۔

عمانی ماحولیاتی اتھارٹی نے سرکاری خبر رساں ایجنسی کے ذریعے جاری بیان میں کہا کہ تیل کا یہ پھیلاؤ جدید ترین نگرانی اور فنی تجزیے، جن میں سیٹلائٹ تصاویر بھی شامل ہیں، کی بنیاد پر ریکارڈ کیا گیا ہے۔

بیان میں مزید بتایا گیا کہ تیل کا یہ دھبہ حلانیات جزیروں کے شمال مشرق میں مرکزی ساحل کی طرف بڑھ رہا ہے اور بعض مقامات پر ساحل سے اس کا فاصلہ صرف سات کلومیٹر رہ گیا ہے۔

رائٹرز اور شپنگ ماہرین کے سیٹلائٹ تجزیے سے ظاہر ہوا ہے کہ 274 میٹر طویل اس جہاز سے تیل کا رساؤ گزشتہ ماہ کے آخر تک پھیلتا رہا، جس سے ممکنہ ماحولیاتی نقصانات پر تشویش بڑھ گئی ہے۔

ابھی تک جہاز کو پہنچنے والے نقصان کی وجہ واضح نہیں ہو سکی اور عمان نے اس بارے میں کوئی وضاحت نہیں دی۔

شپنگ ڈیٹا کے مطابق، اس جہاز پر روسی خام تیل لدا ہوا تھا اور اس نے آخری بار 11 جون کو یمن کے ساحل کے قریب خود کو خودکار شناختی نظام (AIS) کے ذریعے ظاہر کیا تھا۔

روس اکثر اپنی تیل کی برآمدات پر مغربی پابندیوں سے بچنے کے لیے غیر معیاری اور پرانے آئل ٹینکرز پر مشتمل 'شیڈو فلیٹ' استعمال کرتا ہے، جن کی دیکھ بھال مناسب انداز میں نہیں کی جاتی۔

یورپی یونین اور برطانیہ نے 'کارولین بیزنجی' نامی جہاز پر روسی تیل کی ترسیل میں ملوث ہونے کے الزام میں پابندیاں عائد کر رکھی ہیں۔