مدینہ منورہ میں زرعی شعبے کی ریکارڈ ترقی، کھجوروں کی برآمدات اہم محرک

مدینہ منورہ میں زرعی شعبے نے معاشی شعبوں میں سب سے زیادہ 44 فیصد ترقی حاصل کی ہے، جس کی بڑی وجہ علاقے میں جاری بڑے ترقیاتی منصوبے اور کھجوروں کی پیکنگ، تیاری اور برآمدات میں وسعت ہے۔

مدینہ چیمبر کی رپورٹ کے مطابق مارچ 2025 میں زرعی تجارتی رجسٹریشنز کی تعداد 375 سے بڑھ کر مارچ 2026 میں 540 ہو گئی، جو زرعی سرگرمیوں خصوصاً کھجوروں کی پیداوار اور تیاری میں اضافے کی نشاندہی ہے۔

مدینہ منورہ کھجوروں کی سالانہ 3 لاکھ 44 ہزار ٹن پیداوار کے ساتھ مملکت کا تیسرا بڑا علاقہ ہے، جو قومی پیداوار کا 18 فیصد ہے۔ یہاں 26 ہزار سے زائد کھجوروں کے باغات اور 80 لاکھ سے زیادہ کھجور کے درخت ہیں۔

صنعت و برآمدات سے مقامی معیشت کو تقویت

علاقے میں 39 کھجور فیکٹریاں قائم ہیں، جو مملکت میں اس لحاظ سے دوسرے نمبر پر ہیں اور یہ قومی سطح پر کھجوروں کی 161 فیکٹریوں کا 24 فیصد بنتی ہیں۔

مدینہ منورہ کی فیکٹریاں سالانہ تقریباً 10 لاکھ 67 ہزار ٹن کھجور اور اس سے متعلقہ مصنوعات تیار کرتی ہیں، جبکہ پیکنگ کے لیے مخصوص کھجوروں کی مقدار 7 لاکھ 85 ہزار 500 ٹن ہے۔

مدینہ منورہ سے برآمد ہونے والی کھجوریں قومی کھجور برآمدات کا 13 فیصد ہیں، اور یہاں سے سالانہ 4 کروڑ 15 لاکھ کلوگرام سے زائد کھجوریں 60 سے زیادہ ممالک کو برآمد کی جاتی ہیں۔

سرمایہ کاری کے مواقع اور ویلیو ایڈیشن

رپورٹ میں بتایا گیا ہے کہ کھجوروں کی تیاری، پیکنگ اور برآمدات کا شعبہ معیشت کے لیے اہم ذریعہ ہے، جو فوڈ انڈسٹری کو تقویت دیتا ہے، روزگار اور سرمایہ کاری کے مواقع فراہم کرتا ہے اور مقامی زرعی مصنوعات کی قدر میں اضافہ کرتا ہے، ساتھ ہی سعودی برآمدات کو عالمی سطح پر فروغ دیتا ہے۔