امریکی روزگار کے اعداد و شمار کے انتظار میں سونے کی قیمت میں کمی

سونے کی قیمتوں میں منگل کے روز معمولی اتار چڑھاؤ رہا، کیونکہ سرمایہ کار مشرق وسطیٰ میں کشیدگی کے اثرات اور اس ہفتے جاری ہونے والے امریکی لیبر مارکیٹ کے اہم اعداد و شمار کا جائزہ لے رہے ہیں۔

سونے کی قیمت فوری لین دین میں 0.3 فیصد کمی کے ساتھ 4437.10 ڈالر فی اونس پر آ گئی، جو گزشتہ سیشن میں 19 اگست کے بعد کی کم ترین سطح پر پہنچ گئی تھی۔ دوسری جانب امریکی سونے کے فیوچر 0.1 فیصد اضافے کے ساتھ 4485.30 ڈالر فی اونس پر بند ہوئے۔

خبر رساں ادارے رائٹرز کے مطابق، اس ہفتے جاری ہونے والے اہم امریکی اعداد و شمار میں خالی اسامیوں کی تعداد، اے ڈی پی ادارے کی جانب سے جاری کردہ روزگار رپورٹ اور غیر زرعی شعبے کی ملازمتوں کے اعداد و شمار شامل ہیں، جن کا بغور جائزہ لیا جائے گا تاکہ لیبر مارکیٹ کی صحت اور شرح سود کے رجحان کا اندازہ لگایا جا سکے۔

رائٹرز کے مطابق، آئی جی مارکیٹس کے تجزیہ کار ٹونی سیکامور کا کہنا ہے کہ سونے پر دباؤ کی وجہ فیڈرل ریزرو کے سربراہ کی سخت بیانیہ، جیکسن ہول میں مرکزی بینک کے اجلاس اور آبنائے ہرمز میں نئی کشیدگی ہے، جس سے تیل کی قیمتوں میں اضافہ اور افراط زر کی توقعات بڑھی ہیں۔

سی ایم ای گروپ کے فیڈ واچ ٹول کے مطابق، سرمایہ کار اس وقت ستمبر میں امریکی شرح سود میں اضافے کے 66 فیصد جبکہ دسمبر میں 89 فیصد امکانات دیکھ رہے ہیں۔

دیگر قیمتی دھاتوں میں، چاندی کی قیمت فوری لین دین میں 0.3 فیصد بڑھ کر 66.34 ڈالر فی اونس ہو گئی، پلاٹینم 0.1 فیصد اضافے کے ساتھ 1793.03 ڈالر فی اونس رہا، جبکہ پیلاڈیم 1356.75 ڈالر فی اونس پر مستحکم رہا۔