قطر کی ایران کے اردن و کویت پر حملوں کی شدید مذمت

قطر نے ایران کی جانب سے اردن اور کویت کی سرزمین پر تازہ حملوں کی شدید ترین الفاظ میں مذمت کی ہے اور اسے دونوں ممالک کی خودمختاری اور سالمیت کی صریح خلاف ورزی، بین الاقوامی قانون، اقوام متحدہ کے منشور اور حسن ہمسائیگی کے اصولوں کی کھلی خلاف ورزی قرار دیا ہے۔

قطری وزارت خارجہ نے اپنے سرکاری ایکس اکاؤنٹ پر جاری بیان میں کہا کہ ان حملوں کا تسلسل خطے میں کشیدگی کو مزید بڑھانے اور امن و استحکام کے لیے جاری سیاسی و سفارتی کوششوں کو نقصان پہنچانے کا باعث بن رہا ہے۔

وزارت نے اس بات پر زور دیا کہ خطے کے امن و استحکام کو لاحق خطرات کے پیش نظر تمام فوجی کارروائیاں اور حملے فوری اور مکمل طور پر روکے جائیں، کشیدگی میں اضافے سے گریز کیا جائے اور سنجیدگی سے مذاکرات اور بات چیت کے راستے پر واپس آیا جائے، نیز سفارتی کوششوں سے حاصل ہونے والے اتفاق رائے پر عمل کیا جائے۔

وزارت نے مزید کہا کہ قطر اردن اور کویت کے ساتھ مکمل یکجہتی کا اظہار کرتا ہے اور ان کی خودمختاری و سلامتی کے تحفظ کے لیے کیے گئے تمام اقدامات کی حمایت کرتا ہے۔