یوکرین کا روس پر دباؤ بڑھانے کا اعلان

یوکرین کے صدر ولودیمیر زیلنسکی نے پیر کے روز کہا ہے کہ ان کا ملک موسم سرما کے آغاز سے پہلے جنگ کے خاتمے کے لیے روس پر سفارتی، معاشی اور عسکری دباؤ ڈالنے کی کوشش کرے گا۔

زیلنسکی نے یوکرینی اخبار 'کیف پوسٹ' کو دیے گئے بیان میں کہا کہ ہم کوشش کریں گے کہ یہ سب موسم سرما سے پہلے ہو جائے۔ انہوں نے زور دیا کہ یوکرین اپنے اتحادیوں کے ساتھ مل کر روس پر دباؤ بڑھائے گا۔

واضح رہے کہ زیلنسکی متعدد بار یہ کہہ چکے ہیں کہ موسم سرما جنگ کا نہایت حساس اور نازک مرحلہ ہے، کیونکہ اس دوران روسی افواج توانائی کے بنیادی ڈھانچے، بجلی اور حرارتی نظام کو نشانہ بنانے پر خصوصی توجہ دیتی ہیں۔

روس اور یوکرین کے درمیان جاری جنگ میں حالیہ دنوں میں شدید زمینی تصادم اور فضائی حملوں میں اضافہ ہوا ہے۔ روس نے بیلسٹک میزائلوں اور ڈرونز کے ذریعے کیف سمیت مختلف یوکرینی صوبوں میں توانائی کے مراکز اور لاجسٹک تنصیبات کو نشانہ بنایا ہے۔

دوسری جانب، یوکرینی افواج بھی روس کے اندر اور جزیرہ نما کریمیا میں لاجسٹک مراکز اور گوداموں پر ڈرون حملے جاری رکھے ہوئے ہیں۔