سعودی عرب میں آج گرج چمک کے ساتھ موسلا دھار بارش کی پیش گوئی

قومی مرکز برائے موسمیات نے آج اتوار 2 ربیع الثانی 1448 کو مملکت میں موسم کی صورتحال سے متعلق بتایا ہے کہ مختلف علاقوں میں درمیانے سے شدید درجے کی گرج چمک کے ساتھ بارش کا سلسلہ جاری رہنے کا امکان ہے، جس سے سیلابی ریلے بھی آ سکتے ہیں۔ ان بارشوں کے ساتھ ژالہ باری اور تیز ہوائیں بھی متوقع ہیں، جو جازان، عسیر، باحہ، مکہ مکرمہ اور مدینہ منورہ کے بعض حصوں کے علاوہ مشرقی علاقے کے ساحلی حصوں کو متاثر کریں گی، جبکہ ان علاقوں میں دھند بننے کا بھی امکان ہے۔

اس کے علاوہ، نجران اور مشرقی علاقے کے جنوبی حصوں میں گرد آلود ہواؤں کے ساتھ گرج دار بادل بننے کا خدشہ بھی ظاہر کیا گیا ہے۔

بحر احمر کی صورتحال

بحر احمر میں سطحی ہوائیں شمال سے شمال مغرب کی سمت 15 سے 38 کلومیٹر فی گھنٹہ کی رفتار سے چلیں گی، جبکہ موجوں کی اونچائی نصف میٹر سے ڈیڑھ میٹر تک رہے گی اور سمندر کی کیفیت ہلکی سے درمیانی ہوگی۔

خلیج عرب میں سطحی ہوائیں جنوب مغرب سے جنوب مشرق کی سمت 10 سے 25 کلومیٹر فی گھنٹہ کی رفتار سے چلیں گی، موجوں کی اونچائی نصف میٹر سے ایک میٹر تک ہوگی اور سمندر ہلکی موجوں والا رہے گا۔