اسرائیلی فوج کی مغربی کنارے میں بڑی کارروائی کی تیاری، تل گاؤں میں چار فلسطینی شہید

فلسطینی وزارت صحت کے مطابق، مغربی کنارے کے شہر نابلس کے جنوب مغرب میں واقع تل گاؤں میں اسرائیلی فوج کی فائرنگ سے چار فلسطینی شہید اور چار دیگر زخمی ہو گئے، جن میں سے تین کی حالت نازک ہے۔

دوسری جانب، آج اسرائیلی فوج نے اعلان کیا ہے کہ وہ مغربی کنارے میں ایک وسیع کارروائی کے لیے تیار ہے۔ یہ اعلان آج ہونے والے حملے کے بعد سامنے آیا ہے۔

العربیہ کے مطابق، اسرائیلی وزیر اعظم بنیامین نیتن یاہو نے مغربی کنارے میں نئی یہودی آبادیاں قائم کرنے کا حکم دیا ہے، جبکہ وزیر دفاع یسرائیل کاٹز کے ساتھ مل کر اسرائیلی فوج کو اس حملے کے مبینہ ملزم کا گھر مسمار کرنے کی ہدایت بھی جاری کی گئی ہے، جس میں ایک اسرائیلی ہلاک ہوا تھا۔

یہ واقعات تل گاؤں اور قریبی یہودی بستی 'حفات جلعاد' کے قریب پیش آئے، جہاں مسلح آبادکاروں نے فلسطینی بستی پر حملہ کیا۔ فلسطینیوں نے اپنے گھروں اور زمینوں کا دفاع کرنے کی کوشش کی، جس پر ہاتھا پائی اور جھڑپیں ہوئیں۔ ان حملوں کو اسرائیلی فوج کی پشت پناہی حاصل تھی۔