وزارت تجارت کا جعلی ویب سائٹس سے متعلق انتباہ

وزارت تجارت نے خبردار کیا ہے کہ بعض افراد اور ویب سائٹس وزارت کا نام استعمال کر کے شہریوں کی بینکنگ معلومات حاصل کرنے کی کوشش کر رہے ہیں۔ وزارت نے واضح کیا ہے کہ وہ اپنے صارفین سے کبھی بھی بینک اکاؤنٹ یا کارڈ نمبرز، یا تصدیقی کوڈز طلب نہیں کرتی۔

وزارت نے اپنے سرکاری ایکس اکاؤنٹ پر جاری بیان میں کہا ہے کہ جعلی ویب سائٹس یا ایسے افراد سے ہوشیار رہیں جو وزارت کا نام لے کر بینکنگ معلومات حاصل کرنے کی کوشش کرتے ہیں، کیونکہ اس طرح کی معلومات دھوکہ دہی کے مقاصد کے لیے استعمال ہو سکتی ہیں۔

وزارت نے شہریوں پر زور دیا ہے کہ وہ اپنی بینکنگ معلومات یا تصدیقی کوڈز کسی بھی ایسی غیر مصدقہ ویب سائٹ یا فرد کے ساتھ شیئر نہ کریں اور کسی بھی ادارے سے رابطہ کرنے سے پہلے اس کی شناخت کی تصدیق ضرور کریں۔

اعرض التغريدة على منصة X

وزارت تجارت نے رواں سال 2026 کی دوسری سہ ماہی کے لیے صارفین کے لیے ایک رپورٹ بھی جاری کی ہے، جس میں تجارتی اداروں کی نگرانی اور صارفین کے تحفظ کے لیے کی جانے والی کوششوں کا ذکر کیا گیا ہے۔

رپورٹ کے مطابق وزارت نے اس عرصے میں 151,000 سے زائد تجارتی اداروں اور آن لائن اسٹورز کا معائنہ کیا تاکہ ان کی وزارت کے ضوابط پر عمل درآمد کو یقینی بنایا جا سکے، جبکہ 4,000 سے زائد سیل لائسنس جاری کیے گئے جن میں 12 ملین سے زیادہ مصنوعات اور اشیا شامل تھیں۔

وزارت نے مزید بتایا کہ اسی عرصے میں 137,000 سے زائد شکایات نمٹائی گئیں، جن میں سب سے زیادہ شکایات آن لائن اسٹورز اور واپسی و تبادلے کی پالیسی پر عمل نہ کرنے سے متعلق تھیں۔ شکایات کے حل کا اوسط وقت 36 گھنٹے رہا۔

اسی عرصے میں وزارت نے 25 خصوصی مہمات بھی چلائیں، جن کے تحت 48,000 سے زائد گاڑیاں اور ناقص مصنوعات واپس منگوائی گئیں، تاکہ فنی نقائص کا ازالہ اور صارفین کی حفاظت کو یقینی بنایا جا سکے۔