غزہ میں خوراکی امداد میں مزید کمی کا خدشہ

اقوام متحدہ کے ورلڈ فوڈ پروگرام نے آج خبردار کیا ہے کہ اگر اضافی فنڈنگ نہ ملی تو اسے غزہ میں اپنی امداد میں مزید کمی کرنا پڑے گی، جہاں وہ 70 فیصد آبادی کو سہارا دے رہا ہے۔

خبر رساں ادارے رائٹرز کے مطابق یہ انتباہ اس وقت سامنے آیا ہے جب عالمی بھوک پر نظر رکھنے والے ادارے 'انٹیگریٹڈ فوڈ سکیورٹی فیز کلاسیفیکیشن' نے کہا ہے کہ سال کے آخر تک غزہ کی دو تہائی سے زیادہ آبادی کو شدید بھوک کا سامنا ہو سکتا ہے، کیونکہ فنڈز کی کمی کے باعث انسانی امدادی تنظیمیں اپنی سرگرمیاں محدود کر رہی ہیں۔

اس ادارے کی رپورٹ کے مطابق اپریل کے وسط سے جون کے آخر تک شدید بھوک کا سامنا کرنے والوں کی تعداد کم ہو کر 12 لاکھ رہ گئی تھی۔

تاہم توقع ہے کہ دسمبر تک یہ تعداد بڑھ کر 14 لاکھ سے تجاوز کر جائے گی، جو آبادی کا 67 فیصد بنتی ہے۔ ادارے نے خبردار کیا ہے کہ اگر امداد میں کمی آئی تو اب تک کی بہتری بھی خطرے میں پڑ سکتی ہے۔