سعودی عرب: گداگری کی اطلاع کے لیے ہنگامی نمبرز جاری

محکمہ جوازات نے شہریوں اور مقیم غیر ملکیوں سے اپیل کی ہے کہ وہ گداگری کے کسی بھی واقعے کی فوری اطلاع دیں۔

محکمہ نے ایکس پلیٹ فارم پر وضاحت کی کہ مکہ مکرمہ، مدینہ منورہ، ریاض اور مشرقی ریجن میں اطلاع دینے کے لیے نمبر 911 ہے، جبکہ مملکت کے دیگر علاقوں کے لیے نمبر 999 مخصوص ہے۔

محکمہ نے یقین دہانی کرائی کہ تمام اطلاعات مکمل رازداری کے ساتھ لی جائیں گی اور اطلاع دینے والے پر کوئی ذمہ داری عائد نہیں ہوگی۔

ایکس پر اصل پوسٹ دیکھیں

وزارت داخلہ نے واضح کیا ہے کہ گداگری ہر صورت اور ہر شکل میں ممنوع ہے، چاہے اس کی کوئی بھی وجہ ہو۔ جو شخص گداگری کو پیشہ بنائے، کسی کو اس پر اکسانے، اس سے اتفاق کرنے یا کسی بھی طرح مدد کرنے کا مرتکب ہو، اسے قید، جرمانہ اور غیر سعودی ہونے کی صورت میں (سوائے سعودی شہری کی بیوی، شوہر یا اولاد کے) سزا مکمل ہونے کے بعد ملک بدر کر دیا جائے گا۔

وزارت نے اس سے قبل بھی سب کو تاکید کی تھی کہ گداگروں سے کسی قسم کا لین دین نہ کریں اور نہ ہی انہیں رقم دیں، بلکہ عطیات صرف مستحقین تک پہنچانے کے لیے سرکاری خیراتی پلیٹ فارمز اور لائسنس یافتہ اداروں کے ذریعے دیں۔

وزارت نے دوبارہ اپیل کی ہے کہ گداگری کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 پر دیں، تمام اطلاعات مکمل رازداری کے ساتھ لی جائیں گی اور اطلاع دہندہ پر کوئی ذمہ داری نہیں ہوگی۔