کینیڈا نے امریکا کو مشترکہ پل کی افتتاحی تقریب سے باہر کر دیا، ٹرمپ کا منافع میں 50 فیصد حصہ دینے کا اعلان

امریکی صدر ڈونلڈ ٹرمپ نے کہا ہے کہ کینیڈا نے امریکا کو گورڈی ہاؤ پل کی افتتاحی تقریب میں شرکت سے خارج کر دیا ہے۔ یہ پل امریکی ریاست مشیگن کے شہر ڈیٹرائٹ کو کینیڈا کے صوبہ اونٹاریو کے شہر ونڈسر سے ہائی وے کے ذریعے ملاتا ہے۔

ٹرمپ نے اپنے ٹروتھ سوشل اکاؤنٹ پر کہا کہ یہ فیصلہ کوئی مسئلہ نہیں، خاص طور پر اس لیے کہ کینیڈا امریکا کو بھاری کسٹم ڈیوٹی ادا کرتا ہے۔

تاہم ٹرمپ نے کہا کہ پل سے متعلق اصل معاہدہ سابقہ انتظامیہ (جو بائیڈن) نے انتہائی ناقص انداز میں کیا تھا، اس لیے اب وہ معاہدہ برقرار نہیں رہا۔

انہوں نے مزید کہا کہ انہوں نے معاہدے کی شرائط تبدیل کر دی ہیں، جس کے بعد اب امریکا کو پل کے منافع کا 50 فیصد حصہ ملے گا۔

کینیڈا نے امریکا کے ساتھ مشترکہ تقریب منسوخ کر دی ہے، یہ فیصلہ اس وقت سامنے آیا جب واشنگٹن نے اس ہفتے کینیڈین مصنوعات پر مزید کسٹم ڈیوٹی عائد کرنے کا اعلان کیا۔

کینیڈین وزیر ہاؤسنگ و انفراسٹرکچر گریگور رابرٹسن نے ایک بیان میں کہا: "اس ہفتے امریکا کی جانب سے تجارتی اقدامات کی دھمکیوں کے پیش نظر دونوں ممالک کے درمیان مشترکہ تقریب کا انعقاد مناسب نہیں ہوگا۔"

اب مشترکہ تقریب کے بجائے، اوٹاوا نے اعلان کیا ہے کہ یہ سنگ میل 24 جولائی کو صرف کینیڈین شہریوں کے درمیان ایک خصوصی تقریب میں منایا جائے گا، جبکہ پل کو 27 جولائی کو ٹریفک کے لیے کھول دیا جائے گا۔

گورڈی ہاؤ انٹرنیشنل برج، جو کینیڈین ہاکی لیجنڈ کے نام پر ہے اور اونٹاریو کو مشیگن سے ملاتا ہے، کئی ماہ سے دونوں ممالک کے درمیان تجارتی کشیدگی کا باعث بنا ہوا ہے۔

اس سال کے آغاز میں امریکی صدر ڈونلڈ ٹرمپ نے پل کی افتتاحی تقریب میں رکاوٹ ڈالنے کی دھمکی دی تھی، جس کے بعد کینیڈین وزیراعظم مارک کارنی نے جون میں اعلان کیا کہ پل کھول دیا جائے گا، تاہم بعد میں امریکی فریق کے ساتھ "کچھ تکنیکی مسائل" کے باعث افتتاحی تاریخ غیر معینہ مدت کے لیے مؤخر کر دی گئی۔