سعودی عرب میں غیر قانونی مقیم یمنی شہریوں کے لیے دستاویزات جاری

سعودی عرب میں محکمہ پاسپورٹ کے سرکاری اکاؤنٹ نے غیر قانونی طور پر مقیم یمنی شہریوں کی صورتحال درست کرنے کے لیے درکار دستاویزات کی تفصیل جاری کی ہے۔ یہ وضاحت ان اہم سوالات کے جواب میں سامنے آئی ہے جو سعودی عرب میں غیر قانونی طور پر مقیم یمنی شہریوں کی صورتحال کی درستگی سے متعلق پوچھے جاتے ہیں۔

محکمہ پاسپورٹ نے اپنے ایکس اکاؤنٹ پر بتایا کہ مطلوبہ دستاویزات ہر زمرے کے مطابق مختلف ہیں، جن کی تفصیل درج ذیل ہے:

تغریر ایکس پر دیکھیں

پہلا زمرہ: وہ یمنی شہری جن کی اقامہ مدت ختم ہو چکی ہے یا جو کام سے غیر حاضر ہیں، ان کے لیے ضروری ہے کہ ان کے پاس یمن کا کارآمد پاسپورٹ اور میڈیکل ٹیسٹ ہو۔ یہ افراد اپنی صورتحال کی درستگی کی کارروائی وزارت داخلہ اور وزارت افرادی قوت و سماجی بہبود کی ڈیجیٹل سروسز پلیٹ فارمز یعنی ابشر، قوی (پیشہ ورانہ افرادی قوت کے لیے) اور مساند (گھریلو ملازمین کے لیے) کے ذریعے آن لائن مکمل کر سکتے ہیں، اور انہیں سرکاری دفاتر جانے کی ضرورت نہیں۔

دوسرا زمرہ: وہ افراد جن کے پاس زائر کارڈ یا مختلف اقسام کی ختم شدہ وزٹ ویزا ہے اور ان کے بایومیٹرک کوائف سعودی نظام میں درج ہیں، ان کی ویزا کی مدت نظام میں خودکار طور پر 6 ماہ کے لیے بڑھا دی جائے گی۔ اس کے لیے بھی ضروری ہے کہ ان کے پاس کارآمد پاسپورٹ ہو اور انہیں جوازات دفاتر جانے کی ضرورت نہیں۔

تیسرا زمرہ: وہ افراد جن کے پاس یمنی دستاویزات یا پاسپورٹ نہیں ہیں، انہیں چاہیے کہ وہ ابشر پلیٹ فارم پر جا کر تصحیح کے مقام کا انتخاب کریں اور وقت لے کر مقررہ وقت اور جگہ پر یمنی شہریت ثابت کرنے والی دستاویزات (پاسپورٹ یا سفارت خانے سے جاری سفری دستاویز) کے ساتھ حاضر ہوں۔