اقوام متحدہ کی خلیج میں پھنسے 6 ہزار ملاحوں کے انخلا کی اپیل

اقوام متحدہ نے خلیج اور آبنائے ہرمز میں تقریباً 6 ہزار ملاحوں کے انخلا کی اپیل کی ہے، جو 500 کے قریب بحری جہازوں پر پھنسے ہوئے ہیں۔ یہ اپیل اس وقت سامنے آئی ہے جب خطے میں کشیدگی اور بحری ناکہ بندی کے باعث بحری آمدورفت تقریباً مکمل طور پر معطل ہو چکی ہے اور سکیورٹی خدشات میں اضافہ ہوا ہے۔

اقوام متحدہ کے مطابق، آبنائے ہرمز میں بحری نقل و حرکت تقریباً مکمل طور پر رکی ہوئی ہے اور 6 ہزار ملاح 500 جہازوں پر پھنسے ہوئے ہیں۔ ادارے نے واضح کیا ہے کہ بین الاقوامی قانون کے تحت محفوظ گزرگاہ پر فیس لینا غیر قانونی ہے، جبکہ توانائی کی بلند قیمتیں عالمی تجارت کی لاگت میں اضافہ کر رہی ہیں۔

اقوام متحدہ کے ہائی کمشنر برائے انسانی حقوق فولکر ترک نے جمعہ کو مشرق وسطیٰ میں جاری جنگ میں ملوث ممالک سے اپیل کی کہ وہ آبنائے ہرمز میں پھنسے ملاحوں کے انخلا اور واپسی میں مدد کریں۔

خبر رساں ادارے فرانس پریس کے مطابق، جنیوا میں اقوام متحدہ کے ادارہ برائے مہاجرین کی ترجمان شابیا مانتو نے کہا کہ "تنازع میں شامل فریقین کو چاہیے کہ وہ فوری طور پر پھنسے ہوئے ملاحوں کے محفوظ انخلا اور ان کی بحفاظت واپسی کے لیے راستہ ہموار کریں، اور ساتھ ہی ضروری امدادی سامان کی فراہمی کو بھی یقینی بنائیں۔"