چین نے پہلی بار فضائی ایٹمی حملے کی صلاحیت کا مظاہرہ کیا

چین نے پہلی بار سرکاری طور پر اپنی فضائی ایٹمی حملے کی صلاحیت کا مظاہرہ کیا ہے۔ اس حوالے سے سرکاری میڈیا نے ایک ویڈیو جاری کی ہے جس میں فرضی جنگی منظرنامے کے تحت دشمن کے بیڑے پر مربوط حملہ دکھایا گیا ہے۔

اخبار "چائنا ڈیلی" کے مطابق یہ ویڈیو سوشل میڈیا پلیٹ فارم "ویبو" پر جاری کی گئی، جس میں ژیان ایچ-6 این ماڈل کی اسٹریٹجک بمبار اور اس کے ساتھ دو جے-20 اسٹیلتھ لڑاکا طیارے دکھائے گئے۔ بمبار طیارے نے فضاء سے داغے جانے والے JL-1 بیلسٹک میزائل کو لے رکھا تھا، جو ایٹمی وارہیڈ لے جانے کی صلاحیت رکھتا ہے۔

اخبار کے مطابق یہ پہلا موقع ہے کہ چینی پیپلز لبریشن آرمی نے اس نوعیت کی صلاحیت کو کھلے عام ظاہر کیا ہے۔ تاہم، ویڈیو میں دکھائے گئے مناظر یا فوجی مشقوں کے وقت کے بارے میں کوئی تفصیل جاری نہیں کی گئی۔

بیجنگ نے JL-1 میزائل کو پہلی بار ستمبر 2025 میں منعقدہ فوجی پریڈ میں پیش کیا تھا، جہاں دیگر ایٹمی دفاعی نظام بھی دکھائے گئے تھے، جن میں بین البراعظمی بیلسٹک میزائل DF-31BJ، DF-61 اور DF-5C شامل ہیں۔

یہ مظاہرہ چین کی جانب سے اپنی ایٹمی فورسز کو جدید بنانے اور دفاعی صلاحیتوں کو مضبوط کرنے کی کوششوں کا حصہ ہے، خاص طور پر جب بحر ہند و بحرالکاہل کے خطے میں فوجی مقابلہ بڑھ رہا ہے۔ بیجنگ کا کہنا ہے کہ اس کی ایٹمی پالیسی دفاعی حکمت عملی اور کم سے کم ایٹمی صلاحیت برقرار رکھنے کے اصول پر مبنی ہے۔