او آئی سی کی فلسطینیوں کے خلاف اسرائیلی جرائم کی مذمت

اسلامی تعاون تنظیم نے فلسطینی شہریوں کے خلاف آبادکاروں کی دہشت گردی اور منظم جرائم میں اضافے کی شدید مذمت کی ہے۔ تنظیم نے واضح کیا کہ یہ جرائم مقبوضہ فلسطینی علاقوں میں اسرائیلی فوج کی براہ راست حمایت سے ہو رہے ہیں۔

تنظیم کے مطابق حال ہی میں نابلس کی تحصیل تل اور رام اللہ و البیرہ کی تحصیل دیر جریر میں سنگین خلاف ورزیاں سامنے آئیں، جبکہ غزہ پر جاری حملوں کے نتیجے میں درجنوں فلسطینی شہری شہید اور زخمی ہوئے ہیں۔

تنظیم نے مزید بتایا کہ ان حملوں میں فلسطینیوں کی املاک کی تباہی، زرعی اراضی اور گھروں کو نذر آتش کرنا، اور مویشیوں کی چوری بھی شامل ہے، جبکہ مغربی کنارے، غزہ اور القدس میں غیر قانونی آبادکاری میں بھی تیزی آئی ہے۔

تنظیم نے اس بڑھتے ہوئے تشدد کے سنگین نتائج سے خبردار کرتے ہوئے کہا کہ یہ اقدامات بین الاقوامی انسانی قانون، عالمی قراردادوں اور عالمی عدالت انصاف کی مشاورتی رائے کی کھلی خلاف ورزی ہیں۔

احتساب اور شہریوں کے تحفظ کا مطالبہ

تنظیم کی جنرل سیکریٹریٹ نے عالمی برادری اور اقوام متحدہ کے اداروں، بالخصوص سلامتی کونسل سے مطالبہ کیا ہے کہ وہ فلسطینی عوام کو بین الاقوامی تحفظ فراہم کرنے اور نہتے شہریوں کے خلاف منظم جرائم پر اسرائیلی فوج اور آبادکاروں کا احتساب یقینی بنائیں، جیسا کہ بین الاقوامی فوجداری قانون میں درج ہے۔

تنظیم نے تمام ممالک سے اپیل کی کہ وہ مقبوضہ فلسطینی علاقوں میں غیر قانونی آبادکاری کے نظام اور اس کے ڈھانچوں کے خاتمے کے لیے اپنی کوششیں جاری رکھیں۔