یونيفل کی لبنان میں اسرائیلی فضائی خلاف ورزیوں کی نشاندہی

اقوام متحدہ کی عبوری فورس برائے لبنان (یونيفل) نے جمعرات سے اتوار کے دوران لبنان کی فضائی حدود کی 125 اسرائیلی خلاف ورزیاں ریکارڈ کیں، جن میں مجموعی طور پر 418 گھنٹے سے زیادہ فضائی پروازیں شامل تھیں۔ ان میں نگرانی کے لیے ڈرونز اور مسلح طیارے شامل تھے جو فورس کے مقامات کے قریب یا ان کے اوپر پرواز کرتے رہے۔

اقوام متحدہ نے یونيفل کے حوالے سے بتایا کہ جنوبی لبنان میں اسرائیلی فوجی سرگرمیاں بدستور جاری ہیں، جن میں انجینئرنگ کے کام، فوجی نقل و حرکت، مشرقی و مغربی سیکٹرز اور دریائے لیتانی کے شمالی علاقوں میں توپخانے سے گولہ باری اور لبنانی علاقائی پانیوں میں سرگرمیاں شامل ہیں۔

مزید بتایا گیا کہ امن مشن کی نقل و حرکت پر اسرائیلی فوج کی جانب سے عارضی رکاوٹوں کے باعث پابندیاں عائد کی گئیں، جبکہ ایک گشتی پارٹی پر پتھراؤ بھی کیا گیا۔ یونيفل نے غیر پھٹے گولے اور دیسی ساختہ دھماکہ خیز مواد بھی برآمد کرکے انہیں محفوظ طریقے سے تلف کیا۔