لبنانی بزنس مین کا واشنگٹن میں نیتن یاہو اور اہلیہ کے اعزاز میں عشائیہ

لبنانی بزنس مین اور بینکر انطوان صحناوی کی اسرائیلی وزیراعظم بنیامین نیتن یاہو کے ساتھ واشنگٹن میں لی گئی تصویر نے لبنان میں وسیع پیمانے پر بحث چھیڑ دی ہے۔ لبنانی میڈیا کے مطابق متعدد وکلاء نے صحناوی کے خلاف اسرائیل سے رابطے کے الزام میں قانونی کارروائی کی درخواست دی ہے۔

سوشل میڈیا صارفین اور کارکنوں کا کہنا ہے کہ یہ واقعہ محض ایک فرد کا ذاتی عمل نہیں بلکہ اس سے سنگین قانونی اور سیاسی سوالات جنم لیتے ہیں، خاص طور پر اس لیے کہ یہ اقدام لبنانی قانون کی صریح خلاف ورزی ہے جو اسرائیل سے کسی بھی قسم کے غیرقانونی رابطے یا تعلقات پر پابندی عائد کرتا ہے۔

امریکی ویب سائٹ ایکسیئس نے ایک تصویر شائع کی ہے جس میں صحناوی، لبنان کے لیے سابق امریکی ایلچی مورگن اورٹاگس، نیتن یاہو اور ان کی اہلیہ ایک ساتھ نظر آ رہے ہیں۔ رپورٹ کے مطابق لبنانی بزنس مین نے پیر کی شب واشنگٹن کے فور سیزنز ہوٹل میں ایک عشائیہ دیا، جو مرحوم ریپبلکن سینیٹر لنڈسی گراہم کی یاد میں منعقدہ تقریب کے موقع پر ہوا۔ اس تقریب میں ریپبلکن سینیٹر ٹیڈ کروز، گراہم کے اہل خانہ اور متعدد ریپبلکن و ڈیموکریٹ سیاست دان بھی شریک تھے۔

واضح رہے کہ انطوان صحناوی لبنان کے معروف بزنس مین اور بینکر ہیں اور سوسیٹی جنرل بینک لبنان کے چیئرمین ہیں، جو ملک کے سب سے بڑے بینکوں میں شمار ہوتا ہے۔

لبنان میں 'اسرائیل بائیکاٹ قانون' کے تحت کسی بھی فرد یا ادارے کو اسرائیل میں مقیم افراد یا اداروں سے معاہدہ کرنے کی اجازت نہیں، اور اس قانون کی خلاف ورزی پر تین سے دس سال تک قید بامشقت اور جرمانہ عائد کیا جا سکتا ہے۔